Kryetari i Bashkisë së Lezhës Fran Frrokaj me 11 zyrtarë të tjerë të bashkisë do të dalin përpara gjykatës ditën e hënë për tu njohur me masën e sigurisë ndaj tyre. Kreu i bashkisë bashkë me 11 zyrtarët e tjerë u arrestuan ditën e premte pasi akuzohen për tjetërsim të pronave në zonën e quajtur “Rana e Hedhun”.
Arrestimi i zyrtarëve dhe kryebashkiakut është pritur me protesta nga simpatizantët e tyre, të cilët kanë filluar prej ditës së djeshme përpara ambjenteve të bashkisë. Në lidhje me ngjarjen ka reaguar dhe kryetari i Partisë Demokratike, Lulzim Basha i cili tha se drejtësia është selektive dhe kërkoi një hetim transparent për këtë rast, jopolitik dhe të paanshëm.
“Urojmë që Fran Frrokaj të jetë i pafajshëm, të gjithë duhet të jenë të barabartë para ligjit, nga qytetarët e thjeshtë tek politikanët më të lartë. Ne kërkojmë që hetimi të jetë transpraent, jo politik dhe i paanshëm. Shqiptarët meritojnë një drejtësi të pastër dhe profesionale dhe jo një drejtësi të kapur dhe ndikuar nga axhenda politike për drejtësi selektive të drejtuar ndaj një krahu politik në favor të një krahu tjetër”, tha Basha.
Demokratët e Lezhës i kërkojnë Partisë Demokratike që ti dalë në mbështetje Fran Frrokajt. Qëndrimi i kujdesshëm i selisë blu në Tiranë duket se binte ndesh me grupin e njerëzve që u tubuan për të ndjekur seancën e parë gjyqësore Lezhë. Pas arrestimit të kreut të bashkisë dhe zyrtarëve të tjerë, me urdhër të Prokurorisë janë sekuestruar parcela toke me një sipërfaqe prej 258 324 m2. Toka e përfituar është shitur me dokumentacion të falsifikuar duke përfituar padrejtësisht shuma monetare të konsiderueshme.
