Sulmi ndaj autobusit të Borussia Dortmund më 11 prill të vitit të kaluar në prag të ndeshjes së Champions League ndaj Monaco tronditi mbarë opinionin botëror dhe në fillim u klasifikua si sulm terrorist, por nuk ka qenë i tillë. Autori i këtij sulmi Sergej W. ka pranuar se ka përgatitur gjithçka, por jo për të eliminuar apo plagosur futbollistët. Sot, gjatë seancës gjyqësore, Sergej dha versionin e tij të fakteve, duke sqaruar motivin që e shtyu të organizonte atentatin:
“Nuk doja të vrisja askënd, kam programuar atentatin në mënyrë që askush të mos dëmtohej. Jam shumë i keqardhur dhe kërkoj falje për atë që ndodhi, por nuk doja të vrisja, vetëm të detyroja Dortmund të dilte nga Champions League”. Arsyeja ishte se Sergej kishte vënë bast 26 mijë euro që aksionet e Dortmund do të binin. Do të mund të kishte fituar pak më shumë se gjysmë milioni euro.
Kur autobusi i skuadrës u nis nga hoteli në drejtim të stadiumit, tre shpërthimet dëmtuan veç një polic edhe futbollistin e Dortmund, Marc Bartra. U mendua menjëherë për një atentat të ISIS, por më pas u zbulua e vërteta. Fajtori i vetëm ishte Sergej W, njeriut që kishte për qëllim spekulimet në bursë pas atentatit, por tashmë është i akuzuar për 28 tentativa vrasje.
Ai u kuptua se ishte fajtor pasi kishte fjetur në hotelin e Borussia Dortmund në një dhomë me dritaren që shihte pikërisht nga vendi ku ndodhi atentati. Rusi me origjinë gjermane u konstatua nga stafi i hotelit, pasi ishte personi i vetëm që nuk u tensionua pas shpërthimeve të atentatit. Përkundrazi, shkoi në restorantin e hotelit për të porositur për të ngrënë…
