Kryetarja e Lëvizjes Socialiste për Integrim, Monika Kryemadhi në një lidhje të drejtpërdrejtë nga selia e LSI-së për “360 Gradë” në Ora News, reagoi për herë të parë për rrjedhjen e votave të këshilltarëve të LSI-së në këshillin bashkiak të Tiranës.
Kryemadhi: Lali Eri ka dalë në treg me paratë e Bashkisë apo me ofiqet që ofron për të blerë këshilltarët e LSI-së. T’i blejë që t’i gjithë. Jo të gjithë kanë të njëjtin karakter. Jo këshilltarët por edhe godinën e LSI-së ta blejë. Atë licencën e taksive elektrike që ia ka dhënë Endri Fugës dhe vëllait të Edi Ramës që do nxjerrë në rrugë taksixhinjtë në Tiranë që nuk dinë kujt t’i shpëtojnë më përpara nuk do ta shpëtojnë.
As paratë e lejeve të ndërtimit, as paratë e drogës që futen në ndërtim, as koncesionet apo PPP-të për të ndërtuar shkollat e Tiranës nuk kanë për ta shpëtuar lali Erin dhe as Edi Ramën. Nuk është problemi ynë i madh lali Eri se bleu sot një këshilltare që është në paradhomën e Aldrin Dalipit. Edhe lidershipi i LSI i asaj kohe ka përgjegjësi të madhe sepse kur vë emrin në listë çfarë përfaqëson dhe çfarë karakteri ka.
