Tre minuta brenda lokalit “Endi” në Zhegër të Gjilanit u mjaftuan gjashtë hajdutëve që të vjedhin cigare të llojeve të ndryshme në vlerë prej 10.000 eurosh. Ndërsa ata po vidhnin, pronari i marketit bashkë me dy vëllezërit e tij ishte nisur për në vendin e ngjarjes, por gjatë rrugës hajdutët i kishin aksidentuar ata për t’u larguar në një drejtim të panjohur.
Gjashtë persona të dyshuar të cilët tashmë ndodhen nën prangat e Policisë së Kosovës, së pari kishin vëzhguan terenin me makinë e me pas kishin kryer vjedhje. Të njëjtit po hetohen edhe për vjedhje të tjera në Gjilan, Viti e Ferizaj
Venhar Ramadani, pronari i marketit “Endi” tregon për Gazetën Express se nga marketi hajdutët kishin vjedhur rreth 72 lloje të ndryshme të cigareve (afro 720 pako), si dhe 80 steka tjerë të cigareve. Ndërsa nga dy kasafortat e marketit kishin marrë rreth 1500 euro
“E gjithë kjo arrin vlerën e 10 mijë eurove”, thotë pronari i marketit.
Ramadani rrëfen se i pa hajdutët që po ua thyenin lokalin dhe si u aksidentuan me makinë.
Ngjarja ndodhi më 24 nëntor pas orës 12:00, kur edhe vetë Ramadani kishte mbyllur lokalin për të shkuar në shtëpi. Por, pasi kishte ardhur në shtëpi vëllai i tij i kishte treguar se brenda marketit kishin hyrë disa persona.
“Vëllai e ka të lidhur telefonin me alarmin e marketit. Na tregoi se diçka po ndodhte brenda dhe jemi përgatititu shumë shpejt edhe jemi nisur të tre vëllëzërit bashkë”- tregon Ramadani.
Pak para se të mbërrinin te marketi, hajdutët kishin aksidentuar makinën e pronarit të cilën e dëmtuan shumë sa nuk mund të lëvizte.
“Jemi nisur shumë shpejt, në atë moment ka ndodhur edhe aksidenti. Na kanë “mshu” me makinë aq sa makina jonë nuk ka qenë në gjendje të lëvizë dhe as t’i ndjekë,” rrëfen Ramadani.
Përveç dëmeve materiale ata pësuan dhe lëndime të lehta e menjëherë u kthyen në shtëpi për të marrë një makinë tjetër që të ndiqnin hajdutët
“Kemi qenë tre në makinë, tre vllezër dhe jemi kthyer në shtëpi e kemi marrë makinën tjetër dhe i kemi ndjekur nga mbrapa; e kam thirrur policinë për të nxjerrë patrullat sepse e e njohim terenin”- rrëfen Ramadani.
Të tre vëllezërit ishin munduar që t’i gjenin hajdutët duke shkuar deri në Viti por edhe në vende tjera deri në mëngjes. Mirëpo ata kishin arritur që të ikin më shpejt.
Ramadani thotë se nuk i njeh hajdutët, po e kanë dëmtuar mjaft pasiqë është informuar edhe nga policia se të dyshuarit e kanë harxhuar mallin e vjedhur.
Më 15 dhjetor Policia e Kosovës kishte arrestuar njërin nga gjashtë të dyshuarit i cili më pas i ka zbuluar edhe bashkëpunëtorët e tij me të cilët kishte kryer vjedhjen.
“Gjashtë personat janë arrestuar. Të njëjtit kanë kryer vjedhje në Gjilan, Ferizaj, Viti etj. Policia e Kosovës po bën hetimet për të gjetur edhe vendet ku të dyshuarit e kanë shitur mallin”, tha Shaban Azizi nga zyra për informimin në Policinë e Gjilanit, të martën për Gazetën Express.
Nga kamerat e sigurisë së marketit është parë se procedura e vjedhjes kishte zgjatur tre minuta por ata e kishin vëzhguar shumë më herët terenin.
