Deputeti demokrat Ervin Salianji, ka shpërthyer në revoltë përmes një statusi në Facebook, pas vendimit të policisë për të proceduar në gjendje të lirë 10 deputetë të opozitës, për prishje të rendit dhe kundërshtim të policisë. Ai shkruan përmes ironisë se dita e parë në punë e kryeprokurorit Rama, nis me ëndrrën të tij në sirtar, asgjësimin e opozitës dhe mbretërimin mes parave të nxjerra nga gjaku dhe zhvatja e qytetarëve shqiptarë.
“Dita e parë në punë e kryeprokurorit Rama, nis me ëndrrën të tij në sirtar, asgjësimin e opozitës dhe mbretërimin mes parave të nxjerra nga gjaku dhe zhvatja e qytetarëve shqiptarë!
Asnjë ditë s’ka për të fjetur i qetë, kusuret e tij do t’i paguajë ai vetë. Prokuroria dhe gjykatat duhet të hetojnë dhe çojnë pas hekurave kriminelë, banditë dhe të korruptuarit e qeverisë që po e çojnë Shqipërinë në greminë. Duhet të nisë nga Rama që po privatizon Shqipërinë dhe ka patologjinë se do skllavërojë dhe popullin! Ai është skllavi më i madh, skllav i parasë dhe i vesit.
Nga dita e djeshme mbetet vetëm një pishman; duhej reaguar edhe me fort! Kemi kryer vetëm detyrën shtetërore që na ngarkon ligji; në shërbim të qytetarëve dhe në mbrojtje të Kushtetutës.
Puçistët që ishin duke vjedhur votat e opozitës për të emeruar Ramën prokuror, nuk janë të opozitës. Mbrojtja e qytetarëve nga pushteti pa kufi është pa asnjë diskutim detyrë e opozitës.
Një pishman kam nga dita e djeshme, duhej reaguar më fort. Me këta ka vetëm një rrugë, përballja pa kthim!”, përfundon ai.
