Deputetja e LSI-së, Kejdi Mehmetaj i është drejtuar me një letër publike ambasadorëve Donald Lu dhe Romana Vlahutin, ku i shkruan se është ndjerë e dhunuar nga reagimi i tyre për atë që ndodhi në Kuvend.
Mehmetaj në fund i fton ambasadorët t’i bashkohen protestës së ardhshme të opozitës. Deputetja e LSI-së u procedua penalisht në gjendje të lirë për incidentet e ndodhura në Kuvend. Më poshtë pjesë nga letra e Mehmetaj.
“Me deklaratat tuaja, Ju jeni po aq përgjegjës për dhunën që është ushtruar ndaj meje dhe kolegeve të mia, sepse Ju në asnjë rast nuk folët për ne, në asnjë rast nuk mbrojtët të drejtat tona. Jam e sigurtë se në vendet tuaja, nese qeveria do të shkelte Kushtetutën, miliona banorë do të dilnin në rrugë e do të protestonin deri në rrëzimin e qeverisë. Ju nuk mund të na kërkoni që ne të bëjmë të kundërtën. Ju siguroj se ne, 10 vajzat që dje u dhunuam se mbrojtëm Kushtetutën, nuk do të ndalemi në asnjë moment dhe për asnjë arsye. Ne do përpiqemi të tregojmë lidershpit të vërtetë dhe do mundohemi të udhëheqim çdo të ri dhe të re që ende ka ëndrra për Shqipërinë dhe nuk e pranon këtë situatë nëpër të cilën po kalon vendi. Ju presim të na bashkoheni edhe Ju në protestën e rradhës, nëse vërtet e doni Shqipërinë!’
