Deputetët socialistë votuan sot Arta Markun në pozicionin e Prokurores së Përgjithshme të përkohshme, ndërkohë që opozita protestonte brenda dhe jashtë sallës së Kuvendit në lidhje me proçedurat e ndjekura.
Marku ka marrë 69 vota, në një proçes të dyshimtë, ku të paktën 4 karta votimi të deputetëve të PD-së, janë marrë nga kreu i grupit parlamentar socialist, Taulant Balla dhe janë përdorur në votim.
Por si të mos mjaftonte ky veprim, që përbën një skandal në 27 vitet e parlamentarizmit, duket se ligjvënës socialistë kanë nxituar të bëjnë biografinë e Kryeprokurores së zgjedhur prej tyre.
Prej disa ditësh, u paralajmërua se prokurorja e Shkodrës, do të merrte postin e Kryeprokurores, ndërsa emri i saj, u lobua nga kreu i Komisionit të Ligjeve, socialisti Ulsi Manja.
Gjithsesi, pas zgjedhjes së kontestuar të Markut, një tjetër deputet i PS-së, Pjerin Ndreu përmes rrjeteve sociale i ka bërë biografinë Kryeprokurores.
“Arta Marku është bijë e Ndrecë Markut, inxhinier nga Lezha, banues prej vitesh në Fushë Arrëz dhe mbesa e Prel Dedes, një nga familjet më të persekutuara të Iballës së Pukes.
Nëna e saj Liza, është një ndër aktivistet më të spikatura të PD-së në Fushe- Arrëz.
Gruaja e dajës së saj, Albina Deda ishte deputete e PD legjislaturen e kaluar”, shkruan Ndreu në rrjetet sociale.
