Ish-zv.ministrja e Brendshme, njëkohësisht kryesuesja e listës së Tiranës për Partinë Socialiste, Elona Gjebrea, ka shfaqur reagime nervoze pas lajmit se ajo ka udhëtuar me makinën e Habilajve. Madje znj.Gjebrea i kërkoi vetë prokurorisë të paraqitet dhe të shpjegojë të vërtetën e këtij udhëtimi. Por në fakt cila është e vërteta e udhëtimit të ish-numrit dy të Ministrisë së Brendshme me makinën e atyre që aktualisht konsiderohen si një nga organizatat kryesore të trafikut të drogës nga Shqipëria në Itali.
Znj.Gjebrea mori detyrën e zëvendëses së Saimir Tahirit në shtator të vitit 2013, kohë kur qeveria e Edi Ramës nisi punën pasi fitoi zgjedhjet e 23 qershorit të po atij viti. Një muaj më von, shefi i znj.Gjebrea, Saimir Tahiri vendos të shesë një automjet të cilin e kishte blerë në shkurt të atij viti. Ka një diferencë mes çmimit të blerjes dhe atij të shitjes, por kjo mbetet për t’u sqaruar nga Tahiri, i cili gjithashtu është nën hetim nga Prokuroria e Krimeve të Rënda si pjesë e të njëjtit grup të strukturuar kriminal. “Audi” tashmë i famshëm me targë AA003GB u ble nga Tahiri në vlerën e 21 mijë eurove dhe u shit tek Artan Habilaj për 980 mijë lekë.
Ekzaktësisht 10 muaj pasi Tahiri e kishte shitur automjetin tek Artan Habilaj, ai e rimerr sërish në përdorim, edhe pse vetëm për një udhëtim, ku fatkeqësisht apo fatmirësisht, bashkëudhëtare ishte edhe zëvendësja e tij Elona Gjebrea. Të dhënat e sistemit TIMS zbardhin gjithçka ka ndodhur në gusht të vitit 2014, ku dy ish-zyrtarët e Ministrisë së Brendshme kishin më shumë se 10 muaj në detyrë. Asokohe nuk kishin nisur ende denoncimet për grupin e Habilajve, pasi vetëm një vit më pas ish-oficeri i policisë Dritan Zagani do të denonconte publikisht aktivitetin e trafikut të drogës nga kushërinjtë e Ministrit të Brendshëm, Saimir Tahiri.
Më 8 gusht të vitit 2014, ish-ministri i Brendshëm Saimir Tahiri, zëvendësja e tij, Elona Gjebrea dhe familja e saj kalojnë kufirin nëpërmjet portit të Sarandës me destinacion Greqinë. Nisur edhe nga periudha kur është bërë ky udhëtim, medohet se ata kanë shkuar për pushime në Greqi. Gjatë daljes nga Shqipëria nuk është regjistruar ndonjë automjet me të cilin ata mund të lëviznin në territorin grek. Tahiri, Gjebra dhe familja e saj janë kthyer sërish në Shqipëri më dat 16 gusht, pra 8 ditë më pas. Por këtë radhë, ndrsyhe nga dalja, ata janë kthyer me një automjet tip “Audi” që në Tims rezulton i regjistruar me targë AA003GB. Ky automjet drejtohej nga ish-ministri i Brendshëm Saimir Tahiri dhe pasagjerë ishin zëvendësja e tij dhe familja e saj.
Ky udhëtim nxiti prokurorinë të verifikonte mënyrën si kishte hyrë në territorin grek automjeti me të cilin u kthye në Shipëri ish-ministri Tahiri dhe zëvendësja e tij. Sipas të dhënave po në sistemin TIMS rezulton se Artan Habilaj, blerësi zyrtar i makinës së Tahirit kishte udhëtuar më datë 14 gusht drejt Greqisë me automjetin tip Audi me targa AA003GB. Ky automjet i ishte dorëzuar Tahirit, ndërsa Habilaj ishte kthyer sërish në Shqipëri në po të njëjtën datë, por me traget.
Kjo është e vërteta e udhëtimit të Elona Gjebreas në makinën e Habilajve, të paktën nga hetimi i deritanishëm. A ishte ky sugjerim i Ministrit të Brendshëm? A kishjte njohje znj.Gjebrea me kushërinjtë e shefit të saj? Përse Saimir Tahiri vijonte të përdorte të njëjtin automjet që e kishte shitur të paktën 10 muaj më parë? Këto mbeten për t’u sqaruar nga hetimi i mëtejshëm. Në këtë kuptim, nxitimi i znj.Gjebra për të dhënë shpejgime në prokurori rreth kësaj çështje nuk do ketë asnjë surprizë për hetimin, vetëm nëse ish-zv.ministrja e Brendshme jep të dhëna që hetuesit nuk i kanë ende.
