Komisioni i Veprimtarive Prodhuese ka miratuar dje projektligjin “Për përfundimin e procedurave të kalimit të tokës bujqësore të ishndërmarrjeve bujqë- sore në pronësi të përfituesve”.
Drafti i qeverisë parashikon një shtyrje të afatit të ligjit ekzistues, që do t’u mundësojë fermerëve që zotërojnë tokat e ish-ndërmarrjeve bujqësore të ndara me ligjin 7501 dhe të vazhdojnë procedurat për t’i plotësuar ato me tituj pronësie.
Qeveria në draftin e saj propozoi që shtyrja e afatit të jetë deri më 31 korrik të vitit 2018, por deputetët e Komisionit të Veprimtarive u treguan më “bujarë”, duke e çuar afatin deri më 31 dhjetor të vitit 2018. PROBLEMI Gjatë mbledhjes në Komisionin e Veprimtarive, drejtoresha e Administrimit dhe Mbrojtjes së Tokës në Ministrinë e Bujqësisë, Majlida Bozgo, ka treguar dhe shkaqet e vërteta të mospërfundimit të këtij procesi të dhënies së tapive për fermerët që përdorin aktualisht ish-ndërmarrjet bujqësore.
Sipas saj, problemi kryesor është Agjencia e Trajtimit të Pronave, që nuk është treguar në lartësinë e duhur për t’u dhënë përgjigje kërkesave të ligjit. Bozgo tha dje para deputetëve se Agjencia e Trajtimit të Pronave nuk ka zbatuar detyrimin ligjor për t’u kthyer përgjigje kërkesave të bashkive, nëse për tokat e ish-ndërmarrjeve bujqësore që kërkohen të pajisjen me tapi, ka apo jo pretendime nga qytetarë të tjerë për pronësinë e tyre.
“Në materialin fillestar që ne kemi përgatitur për këtë proces, për Ministrinë e Bujqësisë problem është mospërmbushja e detyrimit ligjor nga Agjencia e Trajtimit të Pronave. Agjencia e Trajtimit të Pronës brenda këtij procesi ka një detyrë: duhet të përgjigjet nëse për territoret që kërkohet të plotësohet titulli i pronësisë, pra qytetarët i disponojnë në fakt këto toka, i përdorin për qëllime bujqë- sore, por nuk i kanë të plotësuar titujt e pronësisë, në ligj është përcaktuar detyrimi që ATP të përgjigjet nëse për këto sipërfaqe ka të paraqitura pretendime. Shikojmë që Agjencia e Trajtimit të Pronës ka qenë në pamundësi për të dhënë një përgjigje korrekte”, tha dje Bozgo.
VARIANTI
Përfaqësuesja e Ministrisë së Bujqësisë tha se projektligji është propozuar në dy variante dhe që procesi të gjejë zgjidhje duhet hequr nga ligji roli i Agjencisë së Trajtimit të Pronave.
“Si teknikë, ndoshta do të shtyjmë vetëm afatin, por pak skeptikë mbetemi edhe ndaj përgjigjes korrekte, jo se nuk përgjigjet, por nuk ka kapacitete dhe mundësi për t’iu përgjigjur pyetjes që kërkon ligji. Për këto sipërfaqe, a ka të paraqitura pretendime në Agjencinë e Trajtimit të Pronës? Në qeveri ka shkuar si projektligj në dy forma, fillimisht kemi menduar që ta heqim si përkufizim nga ligji, nuk është hequr.
Por e shohim që ndoshta do të vijmë prapë në të njëjtën situatë vitin tjetër. Është pak problem. Doja ta ndaja me ju, sepse do të vijmë në të njëjtën situatë vitin tjetër dhe nuk më pëlqen të gjendemi”, ka thënë dje Majlinda Bozgo.
Më tej, ekspertja e Ministrisë së Bujqësisë tha se në çdo rast fermerët që i zotërojnë tokat e ish-ndërmarrjeve bujqësore, por nuk i bëjnë dot ato me tapi, mund t’i drejtohen dhe gjykatës.
“Këta qytetarë e disponojnë, pra e përdorin këtë tokë dhe ndoshta me të gjithë të drejtën e tyre mund t’i drejtohen edhe rrugës gjyqësore për ta fituar me të drejtën e parashkrimit fitues. Në shërbim të qytetarëve e mira është që çështjen t’ua zgjidhim në rrugë administrative dhe jo t’i çojmë nëpër procese”, ka thënë dje Bozgo.
