Dhunohet barbarisht çifti i të moshuarve nga 3 persona me amska e armë. 77-vjeçari në gjendje të rëndë

Dy të moshuar kanë përfunduar në spital, pasi janë dhunuar barbarisht në banesën e tyre në Shkallnuer të Durrësit nga tre persona të maskuar dhe të armatosur. Mësohet se bashkëshortët Elezi janë lidhur këmbë e duar me skoç në karrige dhe janë torturuar nga agresorët. Për minuta të tëra ata u janë lutur grabitësve që të mos i vrisnin. Si pasojë e dhunës, 77-vjeçari Maliq Elezi ka humbur vetëdijen në spitalin e qytetit bregdetar, ndaj më pas është dërguar në gjendje kritike për jetën në Spitalin e Traumës në Tiranë. Ngjarja e rëndë ka ndodhur në orët e para të mëngjesit të djeshëm, ndërsa është mbajtur e fshehur nga policia e Durrësit, e cila ka qenë në koherencë në raportimin e lajmeve të tjera të ditës, por jo për masakrimin e bashkëshortëve Elezi. Vetëm në orët e vona të mbrëmjes, blutë e qytetit bregdetar pohuan për “GSH” se dyshohet për një grup të strukturuar banditësh, të cilët pasi marrin informacion të detajuar për pleqtë e vetmuar dhe që kanë fëmijët në emigracion, i sulmojnë dhe i grabisin. Ata kanë marrë një shumë prej 1 milion lekësh të vjetër dhe janë larguar.