Automjeti me të cilin udhëtonte Orest Sota, brenda të cilit u gjendën 860 mijë euro dhe dy leje-drejtimi në emër të Saimir Tahirit, rezulton në pronësi të një tjetër biznesmeni të quajtur Armand Lilo. Ky fakt konfirmohet dhe nga polica e sigurimit të automjetit që ka siguruar Hashtag.al.
Armand Lilo është një emër i lakuar në media gjatë muajit korrik 2017, kur te zona e ish-parkut të autobusëve disa qytetarë kundërshtuan një leje ndërtimi të dhënë mbi lulishte.
Lulzim Basha asokohe i doli në krahë banorëve dhe i mbështeti, por ndërtuesi që kishte përfituar lejen, Armand Lilo, bëri një deklaratë publike ku pretendoi se kunati i Lulzim Bashës dikur i kishte vënë gjobë për të realizuar këtë ndërtim.
Pasi Lilo bëri këtë akuzë, kunati i Bashës e paditi Lilon në gjykatë për shpifje. Biznesmeni Lilo e humbi gjyqin.
Është interesante se si rrethi i personave të lidhur me Orest Sotën përfshin jo vetëm ish-ministrin Tahiri dhe patentat e tij, por dhe pronësia e automjetit të sekuestruar rezulton e lidhur me biznesmenin Armand Lilo, një biznesmen atipik, i angazhuar dhe në beteja politike në favor të Rilindjes.
]
