Progami “Quinta Colonna” në kanalin televizi italian Rete 4 diskutoi mbrëmë rastin e Walter Onichinit, një kasap nga Padova që më 2013 plagosi një nga tre hajdutët që i kishin hyrë në shtëpi gjatë natës. Sot akuzohet për vrasje të mbetur në tentativë dhe rrezikon të paguajë një dëmshpërblim rekord.
Hajduti i plagosur është Elson Ndreca, një shqiptar 25-vjeçar, i cili natën e 22 korrikut 2013 hyri në vilën e Onichinit bashkë me dy bashkëpunëtorë, ku vodhën 4000 euro dhe çelsat e makinës, një Audi S4 e parkuar në rrugicën para shtëpisë, të cilët hajdutët do ta merrnin.
Në atë kohë Onichini, për të mbrojtur të shoqen Sara dhe fëmijën 20 –muajsh, i ndoqi nga pas, duke shtirë disa herë me shotgun dhe një nga goditjet vajti në shenjë: Ndreca bie përtokë, i plagosur në shpretkë dhe në një veshkë.
Sipas dëshmisë së Onichinit, përsëritur edhe në gjyq, ai mori hajdutin në makinë për ta çuar në spital, por pas dy kilometrash Ndreca e kërcënon me një objekt të ngjashëm me një kaçavidë, duke e detyruar të zbresë nga makina. Pas një periudhe në spital, hajduti kalon disa ditë në burg e më pas lirohet me detyrim paraqitjeje, të cilin e shkel. Me plot shtatë ekstradime mbi vete, Ndreca kapet në Belgjikë, ku kishte koleksionuar një seri të re vjedhjesh; i kthyer në Itali i kërkon një dëmshpërblim prej 324 mijë eurosh Onichinit dhe akuzon të shoqen e tij për ndryshim të skenës së krimit. Më 30 nëntor do të jetë audienca për procesin ku Ndreca është i akuzuar për grabitje dhe ku Onichini është i dëmtuari. Sipas mbrojtjes, ishte hajduti ai që e kërcënoi italianin për të zbritur nga makina, por akuza thotë që ishte Onichini ai që e braktisi.
Për këtë, në procesin e nisur më 2015 në gjykatën e Padovas e që do të përfundojë pas një muaji, rrezikon deri në pesë vjet burg dhe pagesën e dëmshpërblimit rekord.
Ndërkaq, hajduti është kthyer në Shqipëri, ndërsa dy bashkëpunëtorët e tij nuk u u gjetën kurrë.
