Këshilli i Ministrave emëroi në mbledhjen e sotme të qeverisë tre zëvendësministra të rinj të kabinetit ‘Rama 2’.
Konkretisht bëhet fjalë për zëvendësministren e Arsimit, Sportit dhe Rinisë, Besa Shahini, Valbona Shujaku tek ministria e Kulturës si dhe Hajrull Çeku, të Ministria e Turizmit dhe Mjedisi. Te tre këta zyrtarë janë nga Kosova.
Duhet të theksojmë faktin se kryeministri Edi Rama prezantoi më 7 tetor në Asamblenë Kombëtare të PS-së emrat e 33 zëvendësministrave të rinj, shumë prej tyre emra thuajse të panjohur për publikun. Gjatë prezantimit të ketyre figurave nga Rama, spikati edhe zgjedhja e tij për t’ja besuar këto poste 3 shqiptarëve nga Kosova.
Po kush janë tre të zgjedhurit e Ramës? Valbona Shujaku ka qenë drejtuese e departamentit të Kulturës në kryeqytetin e Kosovës, Prishtinë.
Ndërkohë Hajrulla Çeku ka qenë drejtor i një organizate me bazë në komunitet që angazhohet për mbrojtjen e qyteteve të Kosovës, ndërsa ka përfunduar studimet master në qeverisje dhe zhvillim lokal.
Ndërsa Besa Shahini është analiste dhe hulumtuese e çështjeve të integrimit evropian dhe politikave arsimore. Deri në verë 2015, ka punuar si analiste me organizatën me bazë në Berlin, Inciativa Europiane për Stabilitet (ESI). Ajo herë pas herë shkruan për gazetat ditore në Kosovë. Shahini ka master nga Hertie School of Governance në Berlin.
