Shqiptarët të cilët zgjodhën pikën kufitare të Kapshticës, sot për të kaluar drejt Greqisë janë përballur me të njëjtën problematikë të djeshme.
Pala greke punon me regjistra vetëm në dalje ndërsa në hyrje të Greqisë lejohen vetëm personat me dokumentacion grek. Ende nuk jepet një informacion zyrtar se kur mund të normalizohet situata. Fluksi i qytetarëve nuk është aq i madh sa dje, por situata pritet të përkeqësohet në orët e mëvonshme. Prej së shtunës paradite pika e Kapshticës është e bllokuar dhe radhët dje shkuan deri në disa kilometra. Traun e doganës në drejtim të Greqisë u lejuan të kalonin vetëm shtetasit me pasaportë greke, të vendeve të tjera të BE, por edhe ata nga Himara.
Mbi këtë bazë mes qytetarëve dje qarkulluan teza se situata ishte një hakmarrje e Athinës për çështjen”Himara”. Por Ministri i Jashtëm Ditmir Bushati i cili ishte dje në Kakavijë dha këtë shpjegim: “Ka një rënie të sistemit Shengen që prek pikat kufitare që ka Greqia me Shqipërinë, Maqedoninë dhe Turqinë, e kemi të verifikuar këtë gjë edhe me pikat e tjera”. Ndërkohë pas afro 14 orësh bllokimi u lirua situata në Kakavijë. Pasaportat e kalimtarëve u vendos të skanoheshin dhe të dhënat të hidheshin në sistem kur defekti të rregullohet.
