Gjykata e Apelit në Vlorë ka vendosur për rikthimin në burg të Rakip Arapajt, 58 vjeçarin e dyshuar si poseduesi i sasisë prej 5 ton të hashash të gjendur në banesën e vëllait (të vdekur) shumë pranë banesës së tij në fshatin Llakatund të Vlorës.
Policia u nis të bënte ekzekutimin e vendimit, por Arapaj nuk është gjendur në banesë. Blutë e Vlorës e kanë shpallur në kërkim ndërsa materialet i janë referuar Prokurorisë së Vlorës.
Vendimi i rikthimit të Arapaj në burg u mor nga trupa e përbërë nga gjyqtarët Klodiana Gjyzari, Hysen Saliko, Petrit Aliaj.
Dosja “Llakatundi” ka ngjallur jo pak bujë mediatike, kjo pasi në rivlerësimin e masës së sigurisë të mbajtur nga gjykatën e Shkallës së Parë, në Vlorë, gjyqtari Arqile Basho vlerësoi që personi nën hetim Rakip Arapaj, të gjykohej në gjëndje të lirë, në kushtët e dorëzimit të pasaportës dhe garancisë pasurore në vlerën e 1 mln lekë të reja.
