Kjo është banesa trekatëshe e biznesmenit në Elbasan Ylli Salla që u grabit në mënyrë të bujshme dhe misterioze në orët e para të mëngjesit të kësaj të hënë!
Autorët, numri i të cilëve mbetet ende i paqartë, hynë nga kjo dritare, siç tregon e zonja e shtëpisë, në një kohë që brenda banesës të gjithë anëtarët ndodheshin në gjumë.
Gruaja: Është hapur dritarja.
Menjëherë pasi kanë depërtuar brenda vilës, autorët janë ngjitur në katin e dytë e të tretë, ku kanë marrë një kasafortë me një sasi të madhe parash dhe kanë dëmtuar një tjetër me dokumente! Ndërsa kur janë larguar kanë vjedhur edhe dy makina të reja të familjes, njëra prej të cilave raportohet se u gjet në orët e pasdites në Tiranë.
Gruaja: Kisha frikë mos kishin vrarë fëmijët lart se unë nuk kisha dëgjuar asgjë. Kishin hapur dyert e shtëpisë. Kishin marrë gjëra me vlerë lart, kasafortën, sendet e floririt, çiften.
Duke theksuar se kjo nuk është hera e parë që ata grabiten, dhe faktin se asnjë nga pjesëtarët e familjes nuk ka dëgjuar asgjë të pazakontë, ata ngrene dyshime se janë vënë në gjumë me lëndë të posaçme.
Gruaja: Ne si duket na kanë vënë në gjumë.
Ylli Salla: Ne nuk e ndjemë për momentin. Mbase hajdutët mund të kenë përdorur gaz.
Ylli Salla është një nga biznesmenët e njohur në qarkun e Elbasanit, me veprimtari në fushën e guroreve por edhe të karburanteve, që vetëm pak muaj më parë u dhunua në mënyrë barbare. Pas deponimit disa orësh në policinë e Elbasanit, biznesmeni thekson faktin se asnjë prej ngjarjeve që kanë prekur familjeve e tij nuk janë zbardhur.
Ylli Salla: Çështjet nuk janë zbardhur. Janë identifikuar personat që kanë ushtruar dhunë ndaj nesh, prokuroria për çudi i ka mbyllur.
Policia e Elbasanit në njoftimin e parë për ngjarjen, tha se po punohet për sqarimin e rrethanave.
Ndërkohë, vajza e biznesmenit, në një sfidë të hapur ndaj policisë ofroi një shpërblim monetar për këdo që do të japë informacione të vlefshme për të identifikuar dhe arrestuar autorët që i grabitën.
