Në një lëvizje të paprecedent në historinë e Spanjës, kryeministri Mariano Rahoj lajmëroi planin e tij për shkarkimin e liderëve të Katalunjës.
Pas një mbledhjeje të kabinetit qeverisës, Rahoj gjithashtu deklaroi zhvillimin e zgjedhjeve të reja për rajonin separatist, kërkesa për pavarësi e të cilit e çoi Spanjën në një krizë të thellë politike.
Kryeministri spanjoll Mariano Rajoy ka paraqitur planin për heqjen e liderëve të Katalunjës, pa shpërbërë parlamentin e rajonit gjysmë-autonom. Pas një mbledhjeje emergjente të kabinetit, kryeministri Rajoy deklaroi se qeveria do të organizojë zgjedhje rajonale brenda 6 muajve ndërkohë që masat e propozuara nga kabineti tashmë i drejtohen për votim Senatit të Spanjës.
Ky vendim i qeverisë spanjolle vjen 3 javë pasi Katalunja organizoi një referendum të diskutueshëm për pavarësinë. Lideri katalan Carles Puigdemont ka injoruar kërkesat nga qeveria kombëtare për të braktisur dëshirën për shkëputje.
Kryeministri Rajoy argumentoi se qeveria e tij mori këtë vendim të paprecedent bazuar në nenin 155 të Kushtetutës spanjolle, për të rivendosur ligjin, për t’u siguruar se institucionet rajonale janë neutrale dhe për të garantuar të drejtat civile të të gjithë qytetarëve. Neni i jep fuqinë qeverisë qendrore në Madrid të vendosë sundim direkt mbi rajonin gjysmë-autonom në rast krize.
Qeveria rajonale e Katalunjës organizoi një referendum më 1 tetor për të vendosur shkëputjen nga spanja. Nga 43% katalanas që morën pjesë, 90% votuan në favor të pavarësisë, ndërkohë që shumë kundërshtarë bojkotuan votimin, duke argumentuar se nuk ishte i vlefshëm.
