Theresa May është rreshtuar gjithashtu në krah të Madridit, në konfliktin e tij me Katalunjën, që pretendon shkëputjen pas referendumit të pavarësisë.
Kryeministrja britanike i tha homologut spanjoll Mariano Rajoy se, Londra nuk do ta njohë mëvetësinë e rajonit autonom. Për shefen e ekzekutivit britanik, referendumi katalanas është i paligjshëm dhe në telefonatën e zhvilluar me Rajoyn e shprehu qartë mendimin e saj, se shpallja e njëanshme e pavarësisë do të bjerë në kundërshtim me sundimin e ligjit.
Më herët, presidenti i Këshillit Europian, Donald Tusk e përjashtoi kategorikisht ndërhyrjen e BE-së në këtë çështje, me gjithë rëndesën e situatës.
“Nuk ka vend, nuk ka asnjë hapësirë për ndonjë lloj ndërmjetësimi, nisme ndërkombëtare apo veprimi. Për shumë arsye, unë jam në kontakt të vazhdueshëm me kryeministrin Rajoy dhe nuk e fsheh se gjendja në Spanjë është vërtet shqetësuese, por pozicioni ynë mbetet i qartë”, tha Tusk.
Komentet e Tusk erdhën disa orë pasi Madridi njoftoi se do të nisë të shtunën procesin e vendosjes së sundimit të drejtpërdrejtë mbi rajonin rebel. Edhe krerë të tjerë europianë, përfshirë Kancelaren gjermane, Angela Merkel, dhe kreun e shtetit francez, Emmanuel Macron, kanë dalë hapur në krah të Madridit, por për presidentin rus Vladimir Putin, kriza e Katalunjës ekspozon hipokrizinë e Perëndimit, që mbështet disa lëvizje separatiste e të tjera jo.
Argumenti i Putinit ishte se vendet perëndimore e përkrahën pavarësinë e Kosovës nga aleati i vjetër i Moskës, Serbia, por nuk bën të njëjtën gjë me Katalunjën apo kurdët e Irakut. Shefi i Kremlinit përmendi edhe kundërshtinë e disa shteteve ndaj aneksimit që Rusia i bëri Krimesë nga Ukraina në vitin 2014, gjë që rezultoi në vendosjen e një serie sanksionesh ndërkombëtare ndaj Moskës.
