Aleanca Popullore shpreh kënaqësinë për përhapjen gjithnjë e më të madhe në opinionin publik të idesë së saj për të VOTUAR KUNDER në zgjedhjet e ardhshme parlamentare.
Aleanca Popullore vlerëson deklaratat dhe qëndrimet e figurave të shquara të shoqërisë civile, të cilat i janë bashkuar thirrjes për të refuzuar sistemin dhe klasën politike që e mbivendos veten në raport me Kushtetutën dhe ligjin.
Aleanca Popullore, e vetëdijshme për rolin e saj dhe të partive në përgjithësi në sistemin politik e institucional, nënvizon se thirrja për të VOTUAR KUNDER më 25 qershor synon të nxisë dhe të bashkojë qytetarët e mirë të këtij vendi, të cilët nuk mund të trajtohen si plaçkë në tregun e pamoralshëm të pakteve të errëta.
Aleanca Popullore shpreh vendosmërinë për ta udhëhequr me këmbëngulje, besnikëri dhe vizion këtë betejë që refuzon marrjen peng të shtetit dhe qeverisjen e keqe.
Aleanca Popullore beson se 25 qershori nuk mund të jetë momenti i ndërtimit të një Kuvendi që duan shqiptarët, por pika e ngjizjes së një pazari politik, që duhet refuzuar, për sa kohë buron nga korrupsioni, varfëria, droga e krimi.
Një VOTE KUNDER më 25 qershor është një votë pro, që e ardhmja të mbetet në duart e shqiptarëve.
VOTO KUNDER në FLETEN e VOTIMIT për t’i thënë JO pengmarrjes së shtetit dhe qeveribërjes nga partitë.
VOTO KUNDER në FLETEN e VOTIMIT për t’i thënë JO pazareve politike që dalin mbi ligjin.
VOTO KUNDER në FLETEN e VOTIMIT për t’i thënë JO zgjedhjeve të pandershme.
VOTO KUNDER në FLETEN e VOTIMIT për t’i thënë JO varfërisë, drogës e krimit.
VOTO KUNDER në FLETEN e VOTIMIT për t’i thënë JO politikës së korrupsionit e zhvatjes.
VOTO KUNDER në FLETEN e VOTIMIT për të mos e mbytur shpresën se Shqipëria bëhet.
