Pak orë pasi Erion Braçe publikoi foto të investimeve në bujqësi në zonën e Lushnjes, reagon Ministri i Bujqësisë Edmond Panariti duke e cilësuar deputetin socialist si një komedian.
Nëpërmjet një statusi në facebook, Panariti deklaroi se Erion Braçe nxjerr foto në profilin e tij, të investimeve në bujqësi dhe i shet si sukses të tijin, ndërkohë që Ministria e Bujqësisë drejtohet nga LSI prej 4 vitesh.
“Çfarë komedie Zoti Braçe, kur shoh që paraqet si vepër tënden, projektin më të sukseseshëm të ujitjes e kullimit, të Ministrisë së Bujqësisë, atë projekt, i cili pas çerek shekulli shkretëtirë investimesh, pajisi me infrastrukturë moderne të kanaleve ujitëse, tokat bujqësore të Lushnjës dhe Fierit. Mijëra hektarë toka të zhuritura, u futën nën ujë për herë të parë dhe mijëra të tjera u rehabilituan dhe u pastruan nga llumi i baltës, por edhe i harresës. Brenda këtij viti, edhe 20.000 hektarë të tjera toka të thara, do të vendosen nën ujë. Një investim ky i paparë, që solli dyfish më shumë prodhim dhe eksporte bujqësore.”– shprehet Panariti në facebook.
Dhe meqë Braçe po krekoset me punët e të tjerëve, Ministri i Bujqësisë ka edhe një mesazh për palmat e preferuara të kryeministrit Rama.
“E meqe jemi tek vaditja, kujtoni kryetarët tuaj të bashkive, të vadisin të paktën palmat e thara buzë rrugëve. Ne vijim, po të dërgoj edhe disa foto, ndoshta jo aq artistike sa tuat, sepse ne kemi qenë gjatë gjithë kohës aty, ndryshe nga ti, që shkon në fund të punimeve, fotografon dhe i konsideron si merita tuat.” – përfundon reagimin e tij Panariti duke publikuar disa nga punët që ka bërë Ministria që ai drejton.
Në fakt, po të shohësh profilin e deputetit Braçe, ka me dhjetra foto të ekspozuara për investimet në bujqësi. Ai madje mburret me këto punë të realizuara në këto 4 vite, por nga ana tjetër nuk shpreh asnjë falënderim për bashkëaleatin e tij, LSI, që drejtonte Ministrinë e Bujqësisë.
Më poshtë fotot e investimeve të publikuara nga Ministri Panariti, por që shfaqen si sukses personal i deputeti Braçe:
