Përfaqësuesit e partive parlamentare kanë lënë kryesinë e Kuvendit një nga një, ndërsa brenda kanë qëndruar kryeministri Edi Rama dhe kreu i PD-së Lulzim Basha. Kjo pas kërkesës që Rama shtroi në tryezë për takimin me kreun e PD-së.
Tryeza zgjati rreth 90 minuta dhe gjatë saj duket se nuk ka pasur kompromis. Gazetarja Marsela Karapanço tha për “BalkanWeb” se burime nga tryeza parlamentare pohojnë se janë të pakta shanset për marrëveshje. Kjo pasi kryeministri Edi Rama qëndron tek data e 18 qershorit. Rama ka folur para krerëve të tjerë të partive duke dhënë arsyet se pse zgjedhjet duhet të mbahen më 18 qershor.
Pas thirrjes publike të Partisë Republikane dhe Partisë Agrare Ambientaliste krerët e forcave politike iu përgjigjën pozitivisht ftesës, duke u ulur në një tryezë për zgjidhjen e ngërçit politik.
Ashtu siç njoftoi më herët ‘BalkanWeb’ takimi nisi në orën 20:00, ndërsa në tryezë, e cila mbahet në Kryesinë e Kuvendit, marrin pjesë kryeministri Edi Rama, njëherësh kreu i PS, kreu i Partisë Demokratike, Lulzim Basha, kryetari i LSI-së, Petrit Vasili, Mimoza Hafizi, pasi Ben Blushi i LIBRA-s nuk mori pjesë, Shpëtim Idrizi i PDIU-së, Dashamir Shehu i LZHK-së dhe Nard Ndoka i PDK-së. Kreu i qeverisë vendosi të ulet përballë Bashës. Prej gati dy ditësh diskutohet mbi kushtin që vendosi zyrtari i Dash, Hoyt Brian Yee, që palët politike të ulen në një tryezë, për daljen e vendit nga kriza.
