Prokuroria e Tiranës dha sot pretencën për studentët që qëlluan me vezë kryeministrin Rama.
Sipas akuzës, ata duhet të dënohen me 60 orë pune në publik.
Kryeministri Rama nuk ka shkuar për të dëshmuar në gjyqin që u zhvillua në Gjykatën e Tiranës.
Pas pretencës, studentët e pandehur dhe përkrahësit e tyre u shprehën se nuk ishin dakord me këtë masë dënimi dhe se në seancën e radhës do t’i kërkojnë gjykatës pafajësi.
“Nuk jemi dakord me kërkesën e prokurorisë për dënimin tonë. Në seancën e radhës do të kërkojmë pafajësi nëpërmjet avokatit tonë”, tha njëri prej tyre.
Ngjarja ndodhi në nëntor 2015. Rama u qëllua me vezë nga studentët kur ai ishte duke dalë nga ambientet e Universitetit të Shkencave Sociale në Tiranë.
Asokohe policia shoqëroi për 8 orë 6 studentë, 5 nga të cilët përfaqësues të “Lëvizjes për universitetin” dhe 3 nga “Lëvizja studentore Prishtinë”.
Arsyeja e këtij veprimi është shpjeguar nga studentët e ‘Lëvizja për universitet’ dhe ka të bëjë me kundërshtimin e tyre lidhur me ligjin për arsimin e lartë të miratuar nga qeveria.
“Lëvizja për universitet ka më shumë se një vit që e kundërshton ligjin e ri të arsimit të lartë, pasi ai zbraz xhepat e shqiptarëve dhe mohon autonominë e universitetit, kemi ndërmarrë shumë protesta dhe as kryeministri e as ministrja e arsimit nuk kanë denjuar t’u përgjigjen kërkesave tona”, thanë studentët.
Sipas tyre, policia ka ushtruar dhunë ndaj aktivistëve që qëlluan me veze automjetin e kryeministrit duke i marrë zvarrë dhe duke shkaktuar terror tek studentët e tjerë.
Emrat e studentëve të shoqëruar
Anita Lushi
Bora Mema
Klodi Hoxha
Viki Çipi
Liri Kuçi
Durim Jasharaj
Dardan Konjufca
Valton Marku
