Ministri i Brendshëm Tahiri zhvilloi sot një takim me kreun e prezencës së OSBE-së në Tiranë, Bernd Borchard.
Pas takimit në një prononcim për mediat zoti Borchard tha ndër të tjera se me Tahirin bisedoi se si mund të pengohet blerja e zgjedhjeve.
Pyetje: I qëndroni deklaratës së 2 miliardë eurove?
Kreu i OSBE: Po. Pati disa keqkuptime që ne i sqaruam me një postim që bëmë në Twitter
Pyetje: Që do të thotë?
Kreu i OSBE: Kisha parasysh që nga 2013 sipas disa vlerësimeve ndërkombëtare të cilat flasin për 1 mijë ton kanabis që llogaritur me vlerën e shitjes në tregun europian janë diku te 2 miliardë euro. Vitin e kaluar kemi parë shkatërrimin e 2.5 milionë bimëve me kanabis. Kjo tregon që mbetet ende një energji kriminale. Ne e përgëzojmë policinë që ka shkatërruar këtë sasi kanabisi. Gjithsesi kapjet në Adriatik dhe në kufi me Greqinë flasin që përpjekjet duhet të vazhdojnë. Diskutuam edhe për të çuar përpara reformën zgjedhore dhe se si mund ta mbajmë larg zgjedhjeve këtë sasi parash.
Kurse ministri Tahiri tha se policia po lufton e vetme kundër kanabisit dhe kërkoi mbështetjen e ndërkombëtarëve. “Lufta kundër kanabisit përfundon këtë vit, të jeni të sigurt. Do vijojmë punën tonë me intensitet”, premtoi Tahiri.
Kujtojmë se dy ditë më parë, kreu i OSBE-se me anë të një deklarate tha se në vendin tonë qarkullojnë mbi 2 miliardë euro, para droge që do të shërbejnë për blerjen e vendit të deputetit.
Kjo deklaratë dje u pasua me një kundëdeklaratë sërish nga ana e OSBE-së, duke thënë se në fakt deklarata e ambasadorit Borchard bënte fjalë për vitin 2013 e jo për 2017.
