Në ditën e 6 të protestës së opozitës kryetari i Partisë Demokratike Lulzim Basha ka kërkuar ndjesë për gabimet e bëra nga qeveria në vitet 2005-2013.
Në një intervistë për emisionin “Opinion”, Basha tha se ai dhe partia që ai drejton ka mësuar nga gabimet e bëra në pushtet.
Basha tha se gjatë 8 viteve të PD-së në pushtet ka pasur persona që kanë përfituar në kurriz të interesit publik.
“Kërkojmë ndjesë për rekordet e qeverisjes sonë të mëparshme ku paradhomat e pushtetarëve diktoheshin nga njerëz të vetëquajtur “kapitenë të medias shqiptare” përmes të cilave kanë pasur përfitime të jashtëzakonshme, shpesh herë në kurriz të interesit publik.
Është rasti të bëj autokritikën në emër të Partisë Demokratike edhe në emrin tim personal. Po e filloj me mediat, e vazhdoj me biznesin dhe oligarkët dhe tu premtoj shqiptarëve se Partia Demokratike dhe Lulzim Basha ka mësuar nga ato gabime dhe ne nuk do t’i përsërisim.
As këta njerëz që rrinin në paradhomat e pushtetit dhe as oligarkët nuk do të ndikojnë vendimmarrjen e ardhshme të Partisë Demokratike që do të dalë me votën e lirë të shqiptarëve” – tha Basha.
