Nga Boldnews.al
Familja e gazetarit investigativ, Telnis Skuqi është dhunuar barbarisht për arsye ende të pashpjegueshme. Bashkëshortja e tij, Ola Skuqi, 28 vjeçe është goditur disa herë, duke i shkaktuar hematoma në pjesë të trupit, si dhe plagë në fytyrë.
Në fotot e siguruara nga Boldnews.al, shihen qartë plagët e marra nga ky akti kriminal dhe i papreçedentë. 28-vjeçarja ka qenë e shoqëruar me dy fëmijët e saj të vegjël ndërkohë që gjatë sulmit kanë qënë edhe fëmijët të cilët janë traumatizuar. Menjëherë e dhunuara, është drejtuar për në Komisariatin e Policisë së Gjirokastrës, për të bërë denoncimin e ngjarjes në fjalë.
Familja e gazetarit investigativ Telnis Skuqi, banon ende në Gjirokastër, në pritje të largimit nga Shqipëria pasi në qershor të vitit të kaluar, Skuqi, kërkoi azil politik në një prej vendeve skandinave, në kushtet e kërcënimeve me jetë që kishte marrë në adresë të tij.
Telnis Skuqi është një nga gazetarët investigativ i cili ka arritur të zbulojë aferat me kultivimin e hashashit në zonën e Gjirokastrës në periudhën 2014-2015 dhe transportimit të kanabisit përmes avionëve që uleshin në zonën e Cepos, çka Skuqi e provoi me pamje fotografike.
Paralajmërimi për ekzekutim mafioz nga elementët kriminalë të kartelit të drogës, Telnis Skuqit i erdhi në prill të 2014 ku i vendosën një kokë dhie pranë banesës së tij, një stil i ngjashëm i përdorur nga mafia kalabreze për të eleminuar kundërshtarët.
Rasti i sotëm, shfaq pasigurinë e familjes Skuqi në Gjirokastër e cila është përpjekur për të pasqyruar gjithmon të vërtetën në media nëpërmjet shkrimeve dhe investigimeve të Telnisit.
Kjo dhunë e ushtruar jashtë çdo norme apo nderi të shoqërisë tonë, tregon edhe njëherë se pushteti i “rilindjes” jo vetëm që po censuron mediat por gjithashtu po denigron figurën e gazetarëve profesionist të cilët pasqyrojnë të vertetën.
Kjo është një këmbanë alarmi për shoqërinë tonë, për kolegët tanë, për gazetarët dhe për fjalën e lirë.
Boldnews.al solidarizohet me familjen Skuqi, ndërsa dënon fuqimisht jo vetëm autorët e kësaj vepre makabre por edhe neglizhencën e institucioneve për të çuar autorët përpara drejtësisë.
