Ajo është një spanjolle që bën karrierë prej më shumë se dy dekadash në Komisionin Europian. Genoveva Ruiz Calavera është gruaja që vjen në Shqipëri me një mision jo fort të lehtë: monitorimi i vettingut.
Tiranapost.al bëri një kërkim në faqen e Komisionit Europian, në rrjetet sociale dhe ajo që mësuam është se Calavera, ashtu si edhe pritej, është e rezervuar në informacionet personale. Ajo ka vetëm një adresë në Twitter dhe e përdor vetëm për aktivitetet e punës së saj. Është një brune me një buzëqeshje të ëmbël dhe të lë përshtypjen e një karakteri shumë të kujdesshëm. Është e martuar me një italian, informacion të cilin e morëm në rrugë personale.
Nëse kërkon në faqen e Komisionit Europian me emrin Genoveva Ruiz Calavera do të gjesh në CV-në e saj edhe një periudhë shërbimi në Kosovë. Atje ka punuar në taskforcën për rindërtimin e Kosovës. Ka një eksperiencë në sektorin e tatimeve dhe doganave, por edhe në sektorin privat spanjoll ku ka punuar për më shumë se dhjetë vite përpara se t’i bashkohej Komisionit Europian në vitin 1992.
Këtë detyrë ajo e ka marë që në muajin dhjetori, kur ishte ajo vetë që e konfirmoi për mediat shqiptare. Me siguri gjatë muajit janar ka pasur kohën e mjaftueshme për t’u njohur me problematikat dhe mënyrën se si do të zbatohet procesi i vettingut. Detyra e saj nuk është monitorimi direkt, po ajo është drejtuesja e monitoruesve. Të gjitha deklaratat, qëndrimet në lidhje me procesin do të bëhen nga Genoveva Ruiz Cala. E thënë thjesht, ajo është drejtorja e grupit monitorues (gjyqtarët dhe prokurorët që vijnë nga vendet e Bashkimit Europian për të bërë monitorimin) dhe me siguri do ta shohim shpesh në lajmet e para dhe do të jetë një nga personazhet e përfolur në Shqipëri. Për këtë arsye pyetëm paraprakisht për të mësuar diçka më shumë rreth profilit të saj profesional por edhe personal.
Burime konfidenciale e përshkruajnë spanjollen Cavalera si një njohëse të mirë të Ballkanit, si një grua të mirë dhe shumë të dedikuar në profesionin e saj. Ne i urojmë suksese drejtoreshës spanjolle dhe kemi shumë besim që kolegia e saj Vlahutin do ia ketë shpjeguar që të njohësh Ballkanin, nuk do të thotë që të njohësh edhe Shqipërinë mirë. Shqiptarët janë të paparashikueshëm, por le t’i urojmë vetëm suksese për momentin.
Të vetmen intervistë që ka dhënë për nja gazetare shqiptare, ka qenë ajo në nëntor me gazetaren Ilva Tare, ku në lidhje me reformën në drejtësi ka thënë:
“Është një kusht per se nga pikëpamja se lidhet me një aspekt shumë të rëndësishëm të reformës së drejtësisë dhe ne themi se reforma e drejtësisë nuk duhet të mbetet thjesht në letër, por duhet zbatuar vërtet dhe kjo sepse qytetarët e duan dhe kanë nevojë për këtë dhe unë mendoj se do të jetë vërtet një reformë historike për Shqipërinë dhe për të gjithë rajonin. Prandaj, ne po kërkojmë të mbështesim autoritetet dhe institucionet shqiptare që të sigurohemi se reforma është e suksesshme.”
“Mendoj se ky proces do të kërkoj mundësisht të paktën dy vjet sepse është një proces shumë i rëndësishëm dhe duhet kryer në mënyrë shumë të besueshme. Ne nuk po themi se komisioni do të presë derisa të vlerësohet edhe gjyqtari i fundit, por po themi se duam të kemi precedentë të besueshëm që procesi po funksionon si duhet dhe po shkon në drejtimin e duhur.”
“Jam e bindur se e rëndësishme është që ne t’i japim procesit kapacitetin për të ecur përpara dhe që të kemi parlamentin shqiptar në qendër të këtij diskutimi qoftë në komisionet parlamentare teknik apo dhe në seancë plenare që të shtyjnë përpara reformën dhe ne, në nivelin tonë, jo vetëm Bashkimi Evropian por edhe partnerët tanë në këtë reformë, administrata e Shteteve të Bashkuara, të mund të japim të gjithë ndihmën e nevojshme.”/tiranapost/
