Policia e Lezhës ka sekuestruar 22 kg drogë dhe ka vënë në pranga një 47-vjeçar, ndërkohë që është shpallur në kërkim një tjetër.
Sipas të dhënave zyrtare është finalizuar me sukses operacioni antidrogë i koduar “Rrjeta” ku efektivët e Seksionit kundër narkotikëve në Drejtorinë Vendore të Policisë Lezhë kanë arrestuar shtetasin Kostandin Mrruku, banues në Mirditë.
Po kështu po punohet për kapjen e shtetasin me iniciale E.D. 33 vjeç, banues në Mirditë.
Këta 2 persona, sipas policisë, janë konstatuar në fshatin Tarazh në Mirditë, me 22 kg lëndë e dyshuar narkotike marijuanë, e paketuar në 20 pako gati për shitje. Droga ishte futur në qese të zeza mbeturinash.
Nga ndërhyrja e forcave policore është bërë e mundur kapja në flagrancë në ikje e sipër e shtetasit Konstandin Mrruku, kurse shtetasi E.D. ka arritur të largohet duke përfituar nga errësira dhe terreni i thyer malor.
Materialet procedurale iu referuan Prokurorisë së Rrethit Gjyqësor Lezhë për veprën penale “Prodhim dhe shitje e lëndëve narkotike”.
