Ylli Manjani, i saposhkarkuar nga kryeministri nga posti i ministrit të Drejtësisë, ka hedhur akuza të forta ndaj Ramës, ministrave të tij dhe policisë së shtetit.
“E dini ju se në Santa Quaranta-n e Kelmend Balilit shkojnë ministrat dhe aty flejnë me dashnoret…Shkojnë krerët e policisë, hanin në hotelin e Balilit…E këtë nuk e di unë se jam ministër, por se këto i kanë regjistruar edhe shërbimet e huaja partnere…E di përse nuk është arrestuar, sepse policët flejnë tek Santa…”, ka thënë Manjani në konferencën e tij për shtyp, pas shkarkimit.
Ja deklaratat e Manjanit për Balilin në “Top Story” më 12 janar 2017:
Ministri i Drejtësisë, Ylli Manjani i ftuar në emisionin “Top Story” foli për arrestimin e Klement Balili dhe faktin që u bë kaq shumë kohë dhe ai ende nuk është vendosur pas hekurave.
I pyetur përse nuk është arrestuar ende Manjani tha se edhe ai çuditej për këtë fakt, por nuk është drejtuesi i Policisë, duke thumbuar ministrin e Brendshëm Saimir Tahiri.
Gjithashtu Manjani hodhi akuza edhe ndaj ligjit të dekriminalizmit duke thënë se ka kryebashkiakë që kanë shitur femra, por që vijojnë ende të jenë në detyre.
Duke rënë këmbanat e alarmit për kreun e bashkisë së Kavajës, Elvis Rroshi.
Sokol Balla: Megjithatë ju morët masa lehtësuese për përdoruesit dhe kultivuesit e vegjël, se kemi parë shpërndarës e kultivues të vegjël të dënuar ndërkohë që Klement Balili është i lirë, nuk mendoni se është padrejtësi.
Ylli Manjani: Ka plot padrejtësi të tilla. Një kryetar bashkie që është në burg tek Krimet e Rënda, se i kërkoi një vajze diçka dhe kemi dhe kryetar bashkie që kanë shit femra dhe janë në detyrë.
Sokol Balla: Po thoni për Elvis Rroshin?
Ylli Manjani: Unë bëra një përgjithësim, nuk merrem më çështje konkrete.
Sokol Balla: Si e keni përjetuar këtë debatin për dekriminalizimin a ka përgjegjësi PS?
Ylli Manjani: Unë nuk mendoj që partitë tona kanë pasur përgjegjësi për përzgjedhjen e këtyre elementeve në lista, sepse kriteri ligjor në atë moment, ishte dëshmia e penalitetit. Rrugës u bë një ligj, që e kërkoi shumë më tepër. Por është pozitive sepse ndihmon për të pastruar politikën nga kjo.
Sokol Balla: Si ka mundësi që ja hedhin peshqit e mëdhenj gjithmonë, si Klement Balili?
Ylli Manjani: Edhe unë pyes sesi ka mundësi. Kam kërkuar që në 12 maj arrestimin e Klement Balilit.
Sokol Balla: Pse nuk u arrestua?
Ylli Manjani: Atë nuk e di unë. Unë nuk drejtoj Policinë e Shtetit. Është e vërtetë që ai ishte një zyrtar i propozuar nga ne dhe në atë kohë ne kemi bërë një distancim të qartë dhe të prerë.
Sokol Balla: Thonë që i janë bërë lehtësi atij për të mos e kapur?
Ylli Manjani: Ka thashetheme dhe lajme.
Sokol Balla: Ju jeni akuzuar se keni udhëtuar me të në Dubai?
Ylli Manjani: Do të më bëhej qejfi, por nuk kam qenë asnjëherë në Dubai.
Sokol Balla: Atëherë si doli gjithë kjo?
Ylli Manjani: Ka njerëz që duan të bëjnë lajme dhe në kohën e fundit janë shtuar shumë.
Sokol Balla: Pse e vonuat përkthimin e dosjes?
Ylli Manjani: Para se të vinte dosja e përkthimit, e njoha Balilin më 17 maj të vitit të shkuar kur Ardian Çipa na ka njoftuar se Klement Balili është vënë në kërkim ndërkombëtar dhe që në 17 maj ai duhej të ishte arrestuar dhe të vihej në dispozicion të prokurorisë shqiptare.
Sokol Balla: Ju kërkuat letra?
Ylli Manjani: Ne kemi kërkuar letrat para se të dilte urdhërarresti. Më 12 maj unë kam kërkuar letrat dhe më 17 maj ka ardhur urdhërarresti.
Sokol Balla: Kishte prova?
Ylli Manjani: Unë nuk e di këtë! Është dosje sekrete, e ardhur nga postë diplomatike nga Athina. Përkthimi i dosjes me 15 përkthyes nuk mori më shumë se disa ditë.
Sokol Balla: Dosja ju erdhi e përkthyer nga Greqia.
Ylli Manjani: Jo! Ka qenë një dosje informale dhe ne nuk merremi me dosjen informale. Ne merremi me dosje të protokolluar.
