Nga Boldnews.al
Një denoncim ka mbërritur në redaksinë e Boldnews.al, ku një qytetar shprehet i shqetësuar për shkatërrimin e pronës që i është bërë në mënyrë të padrejtë nga Inspektoriati Ndërtimor Urbanistik Vendor (INUV), në varësi të Bashkisë së Tiranës.
Bëhet fjalë për një lavazh të ngritur prej vitesh në hyrje të liqenit artificial dhe ku për pronarët ishte një burim jetese. Skandali thellohet edhe më tej, pasi Gjykata Administrative ka vendosur sigurim padie për “Pezullim të vendimit nr. 6006 të INUV, Bashkia Tiranë”, por objekti tashmë është rrafshuar.
Dy vëllezërit Ylli dhe Abaz Sina, pronarë të objektit, kanë paditur INUV më datë 20 tetor 2016, duke kërkuar pezullimin për shembjen e biznesit lavazh. Ata kishin aplikuar për leje legalizimi në vitin 2014 dhe në datë 26 shtator 2016 ALUIZNI kishte kualifikuar ndërtimin e tyre si të rregullt. Por, pak ditë më vonë, më datë 5 tetor 2016 pronarët e truallit dhe godinës vihen në dijeni nga ALUIZNI për përjashtimin në mënyrë aburde nga procesi i legalizimit.
Ky vendim i pashpjegueshëm i ALUIZNI-t, i hap rrugën Bashkisë së Tiranës të drejtuar nga Erion Veliaj, që të ndërmarrë aktin ekstrem, atë të prishjes së biznesit familjar. Pikërisht, më datë 11 tetor të 2016, INUV u dërgon letrën pronarët se objekti i cili kishte për aktivitet një lavazh, do të shembet. Duke mos u pajtuar me këtë vendim të padrejtë dhe të marrë në shpejtësi, pronarët e kundërshtojnë në rrugë gjyqësore. Ata kërkojnë pezullimin e aktit administrativ për prishjen e objektit si dhe shfuqizimin e këtij vendimi.
Të vënë në panik nga fadromat e INUV, vëllezërit Sina gjithashtu kërkojnë nga Gjykata Administrative sigurimin e padisë me qëllim që të mos nis shembja e objektit deri në përfundim të gjykimit.
Në vendimin e saj, Gjykata Administrative u jep të drejtë pronarëve për sigurimin e padisë, por Veliaj me arrogancën e tij as nuk pyeti për gjykatën. Ai dërgon fadromat e INUV dhe më datë 26 janar shkatërron biznesin e ngritur me mund dhe djersë nga vëllezërit Sina.
Si një njeri i shtirshëm para mediave, Veliaj as që nuk pyeti për vendimin e gjykatës, as nuk pyeti për të ardhurat që vinin nga ky biznes dhe kush jetonte me të, as nuk pyeti për të ardhmen e kësaj familjeje. Edhe pse shfaqet si bamirësi më i madh i Tiranës, ku del në foto herë me të varfër dhe herë me të pastrehë, fasada e Veliajt dallohet tepër qartë.
Përveçse shkurtoi vendet e punës, Veliaj u tregua aq i pamëshirshëm saqë nuk mendoi për asnjë moment që të bisedonte me pronarët e lavazhit. Madje ai përdori pushtetin e vet që të ndalohet edhe procesi i legalizimit tek ALUIZNI, duke i shuar edhe mundësinë e dëmshpërblimit në rast prishjeje të objektit.
Ky është standardi i ofruar nga kryetari i Bashkisë së Tiranës, godit qytetarin dhe favorizo oligarkët me kulla dhe tendera disa milionë euro.
