LSI i përgjigjet Saimir Tahirit. Letra e Ilir Metës për presidentin Bujar Nishani, që kishte si objekt mbledhjen e Këshillit të Sigurisë Kombëtare për mos arrestimin e Klemend Balilit, ka ardhur pas një takimi dhe këshille të bërë në SHBA nga kreu i LSI.
Këtë e ka bërë të ditur zv/kryetari i LSI-së, Petrit Vasili gjatë një deklarate për median të bërë mesditën e sotme.
Vasili ka deklaruar se, në Uashington është zhvilluar një takim me një prej drejtuesve të departamentit të Shtetit ku është diskutuar për situatën në Shqipëri. Zv/kryetari i LSI-së tregoi se gjatë bisedës është shprehur shqetësimi për mos arrestimin e Klemend Balilit.
“Se cilat janë reagimet në lidhje me kërkesën e kreut të Kuvendit, nuk besoj se është e nevojshme të bëj komente, po ja lë publikut të gjykojë këto komente dhe pse bëhen.
Gjatë vizitës në SHBA, isha i pranishëm në një takim të zotit Meta me Ndihmës Sekretarin e Shtetit, ambasadorin William Brownfield që shprehur vlerësimin për bashkëpunimin në reformën në drejtësi. I vetmi shqetësimi që ambasadori Brownfield ngriti në këtë takim ishte mosndalimi i Klement Balilit dhe ambasadori i kërkoi zotit Meta të nxiste autoritetet shqiptare për të bërë gjithçka për arrestimin e tij”, deklaroi Vasili.
