Kreu i qeverisë Edi Rama ka larguar nga doganat zv.drejtorin e Përgjithshëm Besmir Qibini.
Ai u emërua në këtë post një vit më parë si pjesë e marrveshjes mes Ministrisë së Brendshme dhe Ministrisë së Financave.
Më parë ai mbante detyra të rëndësishme në Policinë e Shtetit ku është rikthyer pas largimit nga doganat. Qibini tashmë është emëruar Drejtor i Kufirit në Policinë e Qarkut të Vlorës.
Zoti Qibini konsiderohet si një njeri tepër i afërt i ministrit të Brendshëm Saimir Tahiri. Gjatë kohës që punoi si zv.drejtor i Doganave, Qibini ishte përgjegjës për të gjithë strukturën e anti-kontrabandës në dogana.
Qibini është i dyti zyrtar me lidhje të forta me Tahirin që distancohet nga nomenklatura qeveritare e Financave dhe Ekonomisë.
Pak javë më parë, dha ‘dorëheqjen e detyruar’ edhe zv.ministrja e Ekonomisë, Briseida Shehaj, një tjetër zyrtare e afërt e Tahirit.
Më herët Shehaj kishte drejtuar Drejtorinë e Tatimeve por u largua nga ai pozicion prej ministrit Arben Ahmetaj, ky i fundit më pas spastroi dhe njerëzit e Shehajt në tatime.
