Nga Boldnews.al
RTV Ora News vihet sërish në qendër të akuzave për deklarimin joreal të pagave të punonjësve. Një tjetër skandal publikohet pas atij të Alfred Pezës ku pretendonte se ishte paguar me mijëra euro, por në fakt vendimi i gjykatës tregoi se deputeti kishte marrë vetëm 800 mijë lekë të vjetra si Drejtor i Përgjithshëm i RTV Ora News.
Kësaj here bëhet fjalë, për “ikonën” e këtij televizionit, Ilva Tare, e cila mban pozicionin e Drejtoreshës së Informacionit si dhe drejtueses së programit “Tonight” në RTV Ora News. Ka qënë faqja e njohur për denoncime “Lolita” e cila ka publikuar një dokument, ku tregohet paga e deklaruar e Ilva Tares, të cilën e krahason me atë të pastrueses së presidentit të RTV Ora News, Ylli Ndroqit.
Dokumenti i cili është marrë nga Spending Data, tregon se Ilva Tare është paguar në vitin 2015, as më pak dhe as më shumë por 304 764 lekë (të reja). Në një përllogaritje të thjeshtë, Tare ka marrë në muaj 25 397 lekë (të reja), një pagë kjo e krahasueshme sa një shitëse butiku.
Duket e pabesueshme sesi një drejtoreshë e gjithëpushtetshme televizioni ta ketë rrogën sa nje pastruese.
“Shyqyr që ka projekte BE, SOROS e ndonjë organizatë tjetër që justifikojnë rrogat, leckat dhe shtëpitë luksoze kolegët e Fred Pezës, se do ishin për gjynah me rrogat që i kanë deklaruar sa të pastrueses së Ylli Ndroqit” – shkruan “Lolita”.
Në fakt, zërat që qarkullojnë në RTV Ora News, Ilva Tare mund të paguhet nga 4000 deri në 5000 euro në muaj. Për 2 vite e gjysëm, Tare ka marrë nën kontroll televizionin, si Drejtore e Informacionit të RTV Ora News.
Në një shkrim të publikuar në Javanews.al, gazetarja Tare mbronte ish kolegun e saj Alfred Peza, duke thënë se ata që e denoncuan janë hipokrit dhe mercenar. Por njësoj si Tare, edhe Alfred Peza ra në “grackën” e pagave fiktive të deklaruara në RTV Ora News të Ylli Ndroqit.
Për më shumë se 3 vite Alfred Peza ka punuar tek RTV Ora News, duke mbajtur pozicionin e Drejtorit të Informacionit dhe më pas atë e Drejtorit të Përgjithshëm. Sipas një vërtetimi të bërë publik, ai është paguar nga Ylli Ndroqi rreth 800 mijë lekë të vjetra në muaj. Por, Peza kishte deklaruar më herët se nga ky televizion kishte marrë mijëra euro, të cilat janë kursyer bashkë me të ardhurat e tjera duke krijuar një depozitë prej 1.13 miliardë lekë.
Për këtë deklaratë kontradiktore të deputetit Peza, Prokuroria e Përgjithshme ka njoftuar nisjen hetimore për veprat penale të “Pastrimi i produkteve të veprës penale ose veprimtarisë kriminale” dhe të “Fshehjes ose deklarimi i rremë të pasurisë” , vepra këto që në rast se vërtetohen edhe nga gjykata, deputeti socialist rrezikon një dënim deri në dhjetë vjet burg.
Në ambjentet e organit të akuzës është parë edhe presidenti i RTV Ora News, Ylli Ndroqi ndërsa nuk dihet nëse do të thirret për të sqaruar edhe pagën prej 25 mijë lekë të Drejtores së Informacionit, Ilva Tare.
