Deputeti i Rilindjes, Alfred Peza shfrytëzoi Top Story për të ironizuar ish bashkëpunëtorin e tij, presidentin e RTV Ora News, Ylli Ndroqi.
Peza u shpreh se ai ka kursyer para duke bërë 1.13 miliard lekë dhe se nuk ka bërë shpenzime marramendëse duke udhëtuar në Meksikë, Dubai dhe shumë vende të Europës. Kjo ishte një përgjigje ironike ndaj ish eprorit të tij, i cili është edhe Konsulli i Nderit të Meksikës në Tiranë.
I pyetur nga Balla për pagën prej 80 mijë lekë që merrte në RTV Ora News, Peza iu shmang përgjigjes duke thënë se po mbledh vërtetime për pagën e tij.
“Gjatë kohës që kam zhvilluar gjyqin, aq e kam patur rrogën tek RTV Ora News, por pjesën tjetër e kam marrë me honorare dhe shpërblime” – u shpreh Peza, pavarësisht se çdo e ardhur duhet t’i nënshtrohet deklarimit dhe tatimit.
Por Boldnews.al raportoi se deputeti i “rilindjes” ka kontaktuar me presidentin e televizionit Ylli Ndroqi duke i kërkuar dokumentet për pagën e tij reale gjatë kohës që drejtonte këtë televizion.
Por duke qenë se paga e deklaruar e Pezës ka qene 80 mije lëkë të reja, Ndroqi ka refuzuar të ndryshojë dokumentat. Mësohet se ai i ka thënë Pezës se paga e tij ka qenë e deklaruar sipas vërtetimit të bërë publik në media dhe se mund të paraqitet në zyrën e financës për të parë librezën e kontributeve.
Por kjo gjë është kundërshtuar nga Peza i cili ka kërkuar mandat pagesat për pagën reale, pasi siç ka deklaruar dhe vetë deputeti, ai është paguar mijëra euro gjatë kohës që drejtonte RTV Ora News.
Për 3 vite Alfred Peza ka punuar tek RTV Ora News, në pronësi të Ylli Ndroqit. Fillimisht e nisi punën si Drejtor Informacionin dhe më pas mbante pozicionin e Drejtorit të Përgjithshëm të RTV Ora News. Gjithashtu, Peza kishte edhe dy emisione politike në javë, “Ora e Debatit” dhe “Ora e Intervistës”. Paga që përflitej për ish gazetarin Alfred Peza, në atë kohë i kalonte mbi 10 mijë euro.
