57-vjeçari që i vuri flakën vetes me benzinë dy ditë më parë në ambientet e Zyrës së Shërbimit për Qytetarët në policinë e Fierit, ka rrëfyer motivet e ngjarjes.
Marko Silo tha nga shtrati i spitalit në QSUT, se vajza e tij është zhdukur prej tre vitesh dhe për këtë ai ka denoncuar 3 persona, për të cilët dyshon që mund ta kenë trafikuar si prostitute.
Ai akuzon shtetin se nuk ka bërë asgjë për ta ndihmuar.
“Akti im ishte protestë për indiferencën e shtetit. Unë shkova në polici për vajzën time të zhdukur Armela, ata u treguan indiferentë. Kam denoncuar 3 persona që më morën vajzën. Një nga rrëmbyesit ishte i kërkuar edhe nga Interpoli. Vajza para një viti kërkoi të tërhiqnim denoncimin, besoj se vajza ime është nën presionin e rrëmbyesve”, thotë ai për “News 24″.
Silo shprehet se ka frikë për jetën e familjarëve dhe kërkon mbrojtje nga ministrat Tahiri e Majnnai.
Ja informacioni paraprak nga Policia e Fierit:
Më datën 19.01.2017, rreth orës 13:00, ka hyrë në ambientet të Zyrës së Pritjes së Qytetarëve në Drejtorisë Vendore të Policisë Fier, shtetasi M.S, 57 vjeç, banues në Levan, Fier, dhe pa komunikuar me personelin e shërbimit, ka tentuar të djegë veten me benzinë. Falë ndërhyrjes së shpejtë të Shefit të Sektorit të SHCBA, dhe personelit të zyrës së shërbimit të qytetarëve u bë e mundur fikja në kohë e flakëve duke shpëtuar kështu jetën e këtij shtetasi, i cili ndodhet në Spitalin Rajonal Fier nën kujdesin e mjekëve jashtë rrezikut për jetën. Lidhur me këtë ngjarje ju sqarojmë se bashkëshortja e shtetasit të lartëpërmendur, më datën 20.09.2016 ka kallzuar pranë DVP Fier se në vitin 2014 i është larguar vajza nga banesa dhe dyshon se mund të shfrytëzohet për prostitucion jashtë shtetit.
