Lulzim Basha, kreu i PD ndodhet në një vizitë në SHBA ku është i ftuar në ceremoninë e inaugurimit të Presidencës së Donald Trump. Në Uashington, kryeopozitari Basha ka takuar kandidatin për president të SHBA në fushatën brenda republikanëve, Ted Cruz.
Lajmi për takimin me Cruz u bë publik nga vetë Basha, përmes një postimi në Facebook.
“Dje kisha nderin te isha i ftuar në pritjen e organizuar nga Senatori Ted Cruz me të cilin pata një nga bisedat më mbresëlënëse. Jurist i shkëlqyer, prokuror dhe avokat i suksesshëm i Shtetit të Teksasit dhe njohës i rrallë i politikave publike, ai më ofroi këshilla interesante për të luftuar korrupsionin dhe forcuar drejtësinë”, shkruan Basha.
“Ted Cruz është vetë mishërimi i ëndrrës amerikane: me baba kubanezo-spanjoll dhe nënë irlandeze, i lindur në Kanada dhe i rritur në Teksas, sot është figura kyçe e Senatit dhe një ndër politikanët më të rëndësishëm të Amerikës. Kjo karrierë është e mundur vetëm në një vend të lirë dhe të hapur për të gjithë”, përfundon Basha.
