Nga Enkel Xhangoli
Afrimi i zgjedhjeve parlamentare ka rritur edhe më tepër presionin ndaj forcave politike në vend, por më të kërcënuara ndjehen partitë e vogla. Në një seri intervistash për Boldnews.al, krerët e këtyre partive shprehen se pa votim elektronik zgjedhjet e qershorit do të manipulohen ndërsa votat e tyre do të “avullojnë” nga partitë dinozaur si PS dhe PD.
Paskal Milo, Gjergj Bojaxhi, Agron Duka, Mimoza Hafizi dhe Nard Ndoka shprehen se dy partitë e mëdha janë shkaktarët kryesore për vonimin pa arsye dhe pa asnjë rezultat të reformës zgjedhore. Të gjendur përballë kësaj situate, gjithmonë e më tepër po artikulohet krijimi i një “boshti të qendrës”.
Numri 2 i partisë më të re të krijuar në vend, LIBRA, Mimoza Hafizi në prononcimin për Boldnews.al sjell një risi në mënyrën e konceptimit të koalicioneve parazgjedhore dhe paszgjedhore.
“Këtë çështje madhore dhe çdo çështje të funksionimit të LIBRA-s, do ta vendosi antarësia e saj. Tek ne, vendimet e rëndësishme merren përmes votimit. Për të marrë këtë vendim, do të ketë një debat shumë të gjerë dhe shumë të hapur dhe besoj se rezultati do të jetë i pjekur.” – thekson Hafizi.
Ndërkohë kryetari i Partisë Demokracia Sociale, Paskal Milo bën me dije se ka nisur takimet me bazën dhe se ende nuk ka vendosur se në cilin koalicion do të bëjë pjesë. I zhgënjyer nga Partia Socialiste, Milo lë të hapur edhe mundësinë e mbështetjes së një koalicioni të qendrës.
“Partia Demokracia Sociale ka filluar intensivisht përgatitjet për zgjedhjet parlamentare të 18 qershorit. Fillimin e kësaj faze e shënoi mbledhja e Komitetit Drejtues Kombëtar të PDS në 17 dhjetor 2016. Deri në fund të muajit shkurt 2017 do të përfundojë seleksionimi i kanditaturave dhe në prill do të shpallet e do të miratohet programi elektoral i PDS. PDS ende nuk e ka përcaktuar orientimin e saj për koalicionet zgjedhore. Ajo është duke ndjekur me shumë vëmendje zhvillimet politike dhe në kohën e duhur përmes një vendimi të drejtëpeshuar të forumeve përkatëse të saj do të paraqesë edhe vullnetin e saj për bashkëpunim elektoral.”-u shpreh Milo për Boldnews.al
Milo shton më tej se reforma zgjedhore është shndërruar në pazare politike mes PS dhe PD duke shkaktuar vonesa të qëllimshme, e që për rrjedhojë do të krijohen mundësi më të lehta për manipulimin e votave.
“Fjala më e shpërdoruar në fjalorin politik shqiptar është togëfjalëshi “reforma zgjedhore”. Nuk ka patur reformë në kuptimin e mirëfilltë të saj por vetëm kompromise për interesat e tyre e të momentit të fundit nga dy partitë, PD e PS. Vonesat janë shkaktuar gjithnjë prej tyre kur janë alternuar në pushtet. Votimi dhe numërimi elektronik si dhe listat e hapura nuk u interesojnë atyre që duan të vjedhin votat në tavolinë. Asnjë arsye tjetër nuk ka.”- shton më tej kreu i PDS-së.
“Nëse nuk bëhen ndryshimet e propozuara në Kodin Zgjedhor, mbetet e hapur potencialisht mundësia e manipulimit të zgjedhjeve të 18 qershorit. Do të ketë përsëri burime të pista e korruptive të financimit të partive si dhe vjedhje më të mëdha të votave në grupet e numërimit nga militantët e stërvitur e të specializuar të dy apo më shumë partive. Këto janë të njohura por kur vjen puna edhe OSBE si gjithnjë mbyll njërin sy e bën veshin e shurdhër.” – përfundon Paska Milo.
Ndërsa Partia SFIDA për Shqipërinë duket se do të sfidojë e vetme të gjitha forcat politike në vend. Të paktë kështu ka lënë të kuptohet Gjergj Bojaxhi i cili deklaron se statuti i partisë së tij flet qartësisht për koalicionet parazgjedhore.
“Sipas një vendimi paraprak të theksuar edhe në statut SFIDA nuk do bëjë koalicion as para as pas zgjedhjeve të 2017. Për 4 vite do jemi një zë i qartë dhe i fortë opozitar ndërsa për zgjedhjet e 2021 do jetë antarësia që do përcaktojë nëse do jemi në koalicion me ndonjë parti.”- thekson Bojaxhi në intervistën për Boldnews.al.
Gjithashtu ai shton se votimi elektronik është e vetmja mundësi për zgjedhje të lira, ndërsa ky sistem dhe kompromiset e partive politike në vend favorizojnë vetëm disa njërëz të caktuar.
“Ne mendojmë se nuk është problemi tek një nen apo një tjetër por tek shembja e aleancave që këta kryetarë partish kanë bërë me njëri tjetrin dhe financuesit e tyre. Ne besojmë se edhe sikur të miratohet ligji më i mirë por nëse i lihet atyre në dorë për ta zbatuar, do rreshtohen gjithnjë kundër qytetarëve dhe vetëm në favor të një grushti të vogël njerëzish dhe aferash.” – shton më tej kreu i SFIDA.
“Ne jemi dakord me votimin elektronik.”– përfundon deklartën e tij Gjergji Bojaxhi.
Teksa Milo dhe Bojaxhi fajësojnë të dyja palët për vonesën e miratimit të reformës zgjedhore dhe dështimin e votimit elektronik në zgjedhjet e 18 qershorit, kreu i Partisë Demokristiane Nard Ndoka mbështet koalicionin e qendrës, madje ai konfirmon se ka nisur bisedimet e para me disa parti të vogla.
“Sot jemi rreshtuar ne opozitë për një aksion të rëndësishëm politik, për votën e lirë, për standarde në zgjedhje. Një koalicion i qendrës mbetet dëshira e Partisë Demokristiane, unë si drejtues i saj, po përpiqem të harmonizoj një bashkëpunim me disa parti të tjera, që kanë të njëjtën dëshirë dhe qëllim.” u shpreh kreu i PDK-së i pyetur nga Boldnews.al.
Ndërkohë kreu i Partisë Agrare Ambientaliste, Agron Duka duket se është besnik ndaj Partisë Demokratike, por ai i bën thirrje edhe kësaj force politike që të nxitojë me reformën zgjedhore.
“Ne si PAA, por edhe si grup partish të vogla i kemi bërë të qarta kërkesat tona. Kemi propozuar rreth 7 pika në kuadër të reformës zgjedhore. Të ashpërsohen masat e ndëshkimit për shit-blerjen e votës, të bëhet transparenca e financimit të partive, hapësira e barabartë mediatike, votimi e numërimi elektronik etj. Nëse nuk realizohen këto kërkesa, patjetër që ka gjasa për rezultat të manipuluar.” – tha Agron Duka në prononcimin e tij për Boldnews.al.
Pavarsisht kërkesave të vazhdueshme nga partitë e vogla të cilat kërkojnë garanci në zgjedhje, KQZ u shpreh qartë se tashmë është shumë vonë për ndryshime në mënyrën e votimit për zgjedhjet e 18 qershorit. Kjo mund të krijoj një pakënaqësi ndaj partive të vogla, të cilat me shumë gjasa po shkojnë drejt krijimit të një koalicioni të qendrës. Por a do të jetë edhe LSI, pjesë e saj?
Boldnews.al
