Thellohet skandali për gjendjen e mjerueshme që kishte kaluar kamerunasi Janot Tadjon, lojtar i Sopotit.
Edhe pse drejtuesit e Sopotit, pas publikimit të intervistës shokuese të Tadjon, thanë se lojtari është paguar dhe është ushqyer rregullisht në restorantin ku ushqehen të gjithë lojtarët, e vërteta mesa duket është tjetër.
Burime brenda klubit sportiv thanë se janë borxhet dhe mos korrektësia e deputetit të Librazhdit, Taulant Balla, arsyeja pse kamerunasi Janot dhe një pjesë tjetër e lojtarëve librazhdas kanë dalë “në rrugë të madhe”.
Sipas tyre Balla prej 2 muajsh nuk kishte paguar asnjë kacidhe në restorantin ku lojtarët ushqeheshin.
Teksa shtojnë se deputeti prej muajsh mbante me premtime pronarin e lokalit se pagesën e parave do t’ia bënte shumë shpejt por pasi nuk e bëri, restoranti në fjalë nxori në rrugë të madhe lojtarët duke mos ju dhënë më ushqim.
Në këto kushte kamerunasi dhe të tjerë ngelën në mëshirë të fatit.
Në intervistën e tij Janot tregoi se ka jetuar vetëm me sanduiçët që i ofronte falas një piceri në lagje.
Sipas burimeve brenda klubit e njëjta histori ndodhi edhe në kompleksin sportiv në Pezë Helmes.
Pronari i fushës në Pezë Helmes është i njohur si miku i Saimir Tahirit.
Mësohet se Balla edhe këtë kompleks sportiv mbeti disa miliona lekë pa paguar, derisa pronarit të kompleksit “ju sos durimi” dhe lojtarët dolën në rrugë të madhe. Duke i zhvilluar ndeshjet në Fushë Krujë.
Raportohet se edhe në disa hotele në Librazhd dhe Elbasan ku ekipi librazhdas është akomoduar në disa raste, Balla në momentin kur duheshin dhënë paratë është larguar.
