Në intervistën e tij në News24, kryetari i LSI-së Ilir Meta ishte shumë i ngurtë në tregimin e rrugës që do të ndjekë forca e tij përpara zgjedhjeve të 18 qershorit. Meta tha se ende nuk është bërë një analizë për të ardhmen. A do të hyjë në zgjedhje i vetëm? A do të ketë sërish një koalicion me PS-në? Këtyre pyetjeve Meta nuk iu dha një përgjigje të qartë.
“E sigurt është që nuk do të ketë një koalicion parazgjedhor me PD-në” – tha Meta. I pyetur për deklaratat e kryeministrit Rama apo edhe të disa eksponentëve të PDIU-së Meta tha se nuk do të bëjë komente mbi komentet. Sipas tij vendosja e koalicionit nuk është një çështje personale. “Të ishte çështje personale unë dhe Edi Rama nuk do të kishim bërë kurrë koalicion” – tha Meta.
Në lidhje me deklaratën e Ramës se “LSI ka qenë një herë e martuar djathtas”, Meta nuk e kurseu ironinë: “Martesa është vetëm për Monikën. Në politikë ka vetëm marrëveshje. Mund të them vetëm që vendimet e LSI-së i merr vetëm ajo. Të respektueshme, të parespektueshme, janë të patjetërsueshme kur janë marrë.”
