Bashkëshorti i gjyqtares së pezulluar të Gjykatës së Lartë, Odhise Andrea, ka arritur të hyjë ilegalisht në Shqipëri edhe pse rezultonte i shpallur në kërkim me vendim gjykate.
Siç raporton “ABC News” ka mësuar se në sistemin TIMS të policisë së shtetit, i aksesueshëm në çdo pikë të kalimit kufitar, Andrea rezulton si person në kërkim nga autoritetet.
Sipas të dhënave të TIMS-it, Odhise Andrea, figuron i regjistruar vetëm në dalje, atë të datës 13 Korrik në mbrëmje, kur edhe është larguar drejt Brindizit me traget nga Durrësi.
Nga ana tjetër në rrethana të paqarta mbrëmjen e së hënës, Odhise Andrea i shoqëruar nga avokati Ardian Visha, u paraqit në drejtorin e policisë në Tiranë ku u vetëdorëzua.
“ABC News” ka kontaktuar me avokatin Visha, për mënyrën se si ka hyrë në Shqipëri klienti i tij, por ai nuk ka preferuar të komentojë.
Burimet nga prokuroria e përgjithshme i thanë ABC News se kanë kontaktuar dy herë me të dyshuarin në ambientet e policisë, mbrëmjen e së hënës dhe paraditën e së martës dhe në asnjë rast nuk ka preferuar të flas për akuzat. Ai ka thënë se do të flas vetëm para gjykatës për akuzat e korrupsionit, që pretendon institucioni i akuzës ndaj tij.
Prokurori i çështjes Arben Kraja, mësohet se ka njoftuar Gjykatën e Lartë për ekzekutimin e masës së sigurisë ndaj Odhise Andreas. Pritet që kolegji penal i kësaj gjykate, brenda 72 orëve të zhvilloi seancën e vleftësimit të arrestit dhe caktimin e masës së sigurisë ndaj bashkëshortit të gjyqtares.
Sakaq mësohet se prokuroria, do të mbaj të njejtin qëndrim për të dyshuarin Andrea, ata që ai të vazhdoi të rri në qeli me masën e sigurisë “arrest me burg”. Sipas akuzës, Odhise Andrea akuzohet për “korrupsion pasiv të gjyqtarëve”, pasi ka kërkuar dhe marr një shumë prej 50 mijë eurove, që bashkëshortja të favorizonte Eleni Linon dhe Petraq Dashin në marrjen e vendimit, duke i kthyer një sipërfaqe të konsiderueshme prone.
Organi i akuzës pretendon se e ka dokumentuar takimin mes Odhise Andreas dhe personave që kanë paguar parat për vendimarrjen e gjyqtares Majlinda Andrea. Të pandehurit e kësaj dosje, tashmë ndodhen në gjykim pranë Gjykatës së Lartë dhe sëancë e radhës është parashikuar paraditen e datës 13 Janar.
