Anëtari themelues i Partisë Sfida për Shqipërinë Gjergj Bojaxhi thotë se përderisa qytetarët paguajnë gjoba apo kamatëvonesa për shkeljet e afateve të pagesave, e njëjta llogjikë duhet të zbatohet edhe kur shkeljen e bën shteti.
“Shteti duhet të shlyejë në kohë pagesat ose të paguajë për vonesën. Vonesa e pagave po bëhet tashmë traditë çdo fillim viti. Me mijëra mësues dhe punonjës publikë ende nuk kanë marrë rrogën e muajit dhjetor ose sapo e kanë marrë atë me vonesë. Pse shteti të mos paguajë për shkeljen?” – shprehet Bojaxhi.
Ministria e Financës dhe Thesari e shpjegojnë këtë vonesë si pasojë e vendosjes së rregullit financiar pas mbylljes së llogarisë së qeverisë më 31 dhjetor. Por Bojaxhi thotë se këto arsye nuk ndryshojnë faktin që punonjësit publikë duhet të përballen me shpenzime të përditshme.
“Shteti duhet të dëmshpërblejë punonjësit publike ose të ndëshkoje personat përgjegjës te cilët nuk zbatojnë afatet dhe rregullat e lëshimit të pagave për punonjësit buxhetorë në kohë. Nëse nuk ndodh njëra nga të dyja atëherë abuzimi i shtetit ndaj qytetarit do te thellohet në vend që të eliminohet”.- shton më tej ai.
