“Tre të dyshuarit e familjes Çapja nuk e njohën policinë. Ata qëlluan kundër saj pasi dyshuan se po organizohej sërish një atentat nga kundërshtarët e tyre”.
Me këtë argument Prokuroria e Krimeve të Rënda shpalli moskompetencën dhe ridërgoi për hetime të mëtejshme në Prokurorinë e Elbasanit shtetasit Ardian Çapja, Florenc Çapja dhe Bledar Muça, të arrestuar gjatë verës pasi hapën zjarr kundër oficerëve civilë të policisë, të cilët po i mbanin nën vëzhgim për shkak të një ngjarjeje kriminale kundër tyre.
Vepra për të cilën tre të dyshuarit u hetuan tek Krimet e Rënda ishte “vrasje për shkak të cilësive të veçanta, e ngelur në tentativë”, ndërkohë që Prokuroria e Elbasanit do t’i hetojë për “vrasje të ngelur në tentativë” kundër dy apo më shumë personave.
Menjëherë pas shpalljes se moskompetencës nga Krimet e Rënda, Gjykata e Elbasanit i ka lënë të lirë Florenc dhe Ardian Çapjan, të cilët do të hetohen vetëm për veprën e “prodhimit të municioneve”. Ndërkohë që në burg ka ngelur vetëm shtetasi Bledar Muça për dyshimet e vrasjes kundër dy apo më shumë personave të ngelur në tentativë.
Siç thuhet jo zyrtarisht, Krimet e Rënda e shpallën moskompetencën për të zhvilluar hetime të mëtejshme për dosjen e Elbasanit, pas këqyrjes së kamerave të sigurisë të sekuestruara në afërsi të stadiumit të këtij qyteti.
Nga dinamika që shfaqet në kamera, mjeti i policisë me ngjyrë të bardhë, i vendosur për të këqyrur fisin Çapja pas një seri ngjarjesh kriminale në këtë qytet, nuk ka shenja dalluese.
Duke qarkulluar përreth hotelit “Univers”, në afërsi të mjetit civil të policisë është afruar mjeti i zi ku ndodheshin Florenc dhe Ardian Çapja, si dhe Bledar Muça. Ky i fundit pretendon se menjëherë pasi kishte parë në sediljen e dytë të mjetit tjetër një person të armatosur kishte qëlluar me armë zjarri kundër tyre.
Momenti kur Bledar Muça qëllon me armë zjarri, nënvizon prokuroria, shfaqet edhe në kamerën e sigurisë, ndërsa më pas ai zbret dhe largohet në këmbë.
Brenda pak momentesh, pasi mjetet janë përballë, nga makina e Çapjave pretendohet se ka qëlluar me armë edhe Florenc Çapja, ndërkohë që edhe policia u përgjigj me zjarr, Prokuroria e Krimeve të Rënda thotë se edhe agjentët e vëzhgimit nuk kishin shenja dalluese të policisë, duke iu referuar edhe dëshmisë së të dyshuarve që pretendojnë se mjeti ku ishin agjentët civilë iu është dukur i dyshimtë pasi kishte disa dite që qakullonte përreth biznesit të tyre.
Por agjentët civilë të policisë ishin vendosur në qytetin e Elbasanit në kuadër të një plani masash të Policisë së Shtetit, tre ditë pasi kundër fisit Çapja ishte organizuar një atentat për motive hakmarrjeje nga kundërshtaret e tyre./ Top Channel
