Shkollat nuk po mbahen të mbyllura për shkak të gripit, siç deklaron qeveria. Gripi është vetëm një pretekst dhe shkaku i vërtetë është i ftohti dhe mungesa e ngrohjes në shkolla. Kështu ka deklaruar sot kreu i opozitës dhe PD-së, Lulzim Basha.
Basha ka lëshuar akuza në drejtim të qeverisë, kur thotë se ekzekutivi ka harxhuar mbi 400 milionë euro për fasada dhe mbi 300 milionë euro koncesione, duke grabitur pasuritë dhe fondet publike për të pasuruar veten dhe klientët e tij, ndërsa shkollat i ka lënë në gjendje të mjeruar dhe sistemin e shëndetësisë po e falimenton, siç shprehet ai.
Ja deklarata e plotë e Lulzim Bashës:
Shkollat po mbahen të mbyllura dhe nxënësit larg bankave, për shkak të të ftohtit, dhe jo të gripit.
Gripi është pretekst për të shmangur tragjedinë që mund të shkaktohet nga mungesa e kushteve minimale. Shkollat ku shkojnë pjesa më e madhe e fëmijëve, janë pa ngrohje, pa xhama, janë akull të ftohta. Prandaj edhe temperaturat e këtyre ditëve janë rrezik i vërtetë për fëmijët.
Edi Rama ka harxhuar 400 milionë euro për projektin megalloman dhe abuziv të fasadave dhe shesheve. Ndërkohë i ka lënë shkollat e vendit në gjendje të mjeruar. Për shkollat Edi Rama ka deklaruar se nuk ka para, ndaj ka vendosur që t’ia u japë edhe ato me koncesion klinetëve të tij.
Por gripi që qeveria po përdor si pretekst për mbylljen e shkollave është shenja më e qartë e falimentimit të sistemit të shëndetësisë. Mbi 300 milionë euro koncesione ka dhënë Edi Rama në shëndetësi, para që po shkojnë për klientët e tij pa i sjellë asnjë përfitim njerëzve, asnjë përfitim të sëmurëve. Ndërkohë që qeveria nuk ka fonde për të vaksinuar grupet e njerëzve që rrezikohen më shumë nga gripi.
Tashmë është e qartë se reformat e bujshme rilindase kanë qenë propaganda për të verbuar njerëzit, faqe grabitjes së pasurive dhe fondeve publike me të cilat po pasurohet Edi Rama dhe klientët e tij.
Çdo ditë që Edi Rama qëndron në pushtet është një ditë e keqe për ne dhe të ardhmen tonë. Le ta ndalim së bashku këtë të keqe. Le ta vëmë qeverinë në shërbim të njerëzve.
