“Estrefi nuk e ka mbushur vitin që doli nga burgu. U kap me 3 gramë hashash që po e pinin shokët e tij. Mori përsipër veprën penale dhe e dënuan me 3 vjet burg. U lirua në shkurt por u kap sërish në 22 dhjetor për një cigare hashash. Më datë 27 e dërguan në Rrogozhinë. E arrestuan për të dytën herë për një cigare hashash. Të tjerët që trafikojnë drogë me kamionë shëtisin të lirë…Para 4 ditësh, kur e takoi djali i madh ai rrinte i heshtur”. Kështu është shprehur Ardian Halili, babai i 22 vjeçarit që u vetëvra në burgun e Rrogozhinës ku vuante dënimin.
Ai thotë se djali i tij e ka bërë këtë akt ekstrem “për shkak të ngarkesës psikologjike”.
Mes lotësh nëna e tij thotë se djali i saj nuk merrej me trafik droge. “Ma morën të gjallë, pse nuk ma sjellin të gjallë. Djali im nuk merrej me gjë, mezi e kam rritur! Ne mezi sigurojmë thesin e miellit”, thotë ajo mes lotësh. Të tronditur ajo që ka ndodhur, familjarët kërkojnë që drejtësia të zbardhë sa më parë shkaqet që e shtynë të riun drejt vetëflijimit.
Sipas tyre, Estrefi nuk kishte konflikt, ishte tip i urtë dhe nuk kishte shfaqur asnjëherë probleme.
