Nga Boldnews.al
Këshilli i Ministrave vendosi sot të mbyllë shkollat, kopshtet dhe çerdhet nga data 4 deri më datë 7 janar 2017 për shkak të përhapjes së virusit të gripit. Për ta bërë të besueshme, njoftimi u bë nga Ministria e Shëndetësisë dhe u shoqërua me një sërë rekomandimesh të Institutit të Shëndetit Publik për të evituar përhapjen e virusit. Por në fakt e vërteta rezulton të jetë ndryshe.
Nëpërmjet një denoncimi të bërë tek NISMA #, një punonjëse e Drejtorisë Arsimore shprehet në kushte anonimati se vendimi i qeverisë për të mbyllur shkollat, kopshtet dhe çerdhet është një fars pasi nuk lidhet me epideminë e gripit por me mungesën e ngrohjes së ambjenteve për fëmijët. Punonjësja shton më tej se për shkak të temperaturave të ulëta që priten ditët në vijim, në godinat shkollore dhe parashkollore është vendosur alarmi se nuk mund të përballohet i ftohti që do të prekë vendin këto ditë.
Në denoncim thuhet më tej se shumica e klasave nuk kanë ngrohje as për temperatura normale të stinës së dimrit, e jo më kur termometri do të shënojë -10 gradë celsius. Ndërkohë situata është edhe më kritike jashtë Tiranës, ku përveç mungesës së ngrohjes, nxënësit përballen edhe me klasa pa dyer apo me xhama të thyer.
Për këtë arsye, thotë punonjësja, është kërkuar që të pezullohet mësimi përgjatë kësaj jave pasi sipas metereologëve javën që vjen temperaturat do të normalizohen. “Nuk e kuptoj pse duhet gënjyer edhe për këtë gjë dhe nuk dilet hapur tek njerëzit dhe të thuhen gjerat siç janë. Skemi o popull ngrohje për çerdhet dhe kopshtet për të përballuar këto lloj temperaturash.” – përfundon denoncimi i punonjëses së DAR.
