Fqinjët e familjes Shehu, ku humbi tragjikisht dy ditë më parë mes flakëve gruaja 35 -vjeçare, Elda Shehu, dhe foshnja e saj 6 -muajshe, kanë hedhur akuza të rënda.
“Nëse zjarrfikësja do të vinte në kohë, mund të ishte shmangur tragjedia”, thonë ata.
Nga ana tjetër, bashkëshorti i saj, Genci Shehu, dje ishte i tronditur nga ngjarja e rëndë dhe i pafuqishëm për të rrëfyer atë që ndodhi. Ai u shpreh vetëm me fjalët se do të shprehej më vonë për këtë tragjedi në familjen e tij, çka linte të kuptonte se do të kërkonte zbardhjen e ngjarjes dhe vënien para përgjegjësisë ligjore të përgjegjësve, përfshirë këtu vonesën e zjarrfikëses.
Tymi ka shkuar deri në katet e sipërme, duke lënë gjurmë nëpër muret e jashtme të pallatit. Ndërsa brenda, apartamenti ishte i kyçur dje nga Policia për shkak të vlerësimit të provave në terren nga grupi hetimor.
Komshinjtë e fatkeqes nuk rreshtin së akuzuari zjarrfikësen, e cila erdhi me vonesë në vendngjarje, ndonëse reparti zjarrfikës nga objekti në fjalë ka një largësi gati 700 metra. “Kjo është një tragjedi e madhe. Zjarrfikësja ka ardhur me 45 minuta me vonesë nga momenti i lajmërimit, ndonëse nga pallati jonë nuk është më larg se rreth 700 metra. E kemi lajmë suar sapo janë konstatuar flakët. Nuk di nëse pas lajmërimit tonë kanë shkuar të mbushen me ujë në lumë apo çfarë ka ndodhur, por zjarrfikësja ka ardhur atëherë kur çdo gjë kishte mbaruar”, u shpreh dje një fqinj i familjes Shehu.
Të gjithë banorët janë tronditur nga kjo ngjarje e rëndë, ndërsa asnjëri prej tyre nuk arriti dot të futej dhe të shpëtonte nënën me foshnjën e saj. Trupi i të ndjerës është tërhequr dje nga morgu i spitalit për ta dërguar në fshatin Bëncë, te banesa e të atit të saj. Ngushëllimet janë pritur në banesën e babait të viktimës, ku vëllezërit e saj dhe familjarët morën përsipër shpenzimet e varrimit dhe pritjen e ngushëllimeve në shtëpinë e tyre. Çifti Shehu banonte me qira në apartamentin që u shkrumbua nga flakët në qytetin e Tepelenës, në lagjen “15 Shtatori”, ndërkohë që vetë e ndjera ishte shtëpiake e papunë dhe rriste fëmijën e saj 6 muajsh.
Ai që mbante familjen ishte i shoqi Genci, i cili ka marrë një lokal me qira në Tepelenë. “Do të flas pasi të vërtetoj gjithçka për atë që më është thënë që zjarrfikësja ka ardhur me vonesë”, u shpreh ai mes lotëve për ngjarjen e rëndë. Në momentin e tragjedisë, ai ka qenë në lokal dhe është lajmëruar nga komshinjtë. Ndonëse ka hyrë mes flakëve, ai nuk arriti të shpëtonte të shoqen dhe fëmijën e tij.
