Marian Levanti pranoi sot krimin ndaj familjes së ish-bashkëshortes dje në mbrëmje në Tiranë duke bërë fajtorë të afërmit e gruas për divorcin e tij.
Sipas tij, ish-vjehrrja dhe ish-vjehrri ishin shkaktarë të ndarjes së tij nga e shoqja, Elena Kocaqi, një historiane e njohur.
“U futa fshehur në banesën e ish-vjehrrit, u fsheha poshtë krevatit dhe prita deri sa të vinin në shtëpi. U hakmora pasi ata ishin shkaktarët që më prishën familje e me ndanë nga gruaja. Kemi debatuar dhe herë të tjera dhe ata nuk më lejonin të takohesha me Elenën”, ka thënë ai.
“Ata me ndanë nga gruaja. Kemi qenë të martuar që prej 2008 kemi 2 fëmijë. Për një gabim që kam bërë në 2013 ata me quajnë ‘kriminel’ dhe ‘burgaxhi’. Ia mbushen mendjen Elenës të më braktisë”, ka thënë 37-vjeçari në polici.
E duket se padia për zgjidhje martese që Elena Kocaqi ka bërë ndaj të shoqit Marjan Levanti më 1 dhjetor të këtij viti ka qenë edhe shkaku i ngjarjes së djeshme.
37-vjeçari ka disa muaj që ka dalë nga burgu ku vuajti dënimin për plagosje të rëndë me dashje të një 18-vjeçari, ngjarje që dyshohet se çoi edhe në vrasjen e vëllait të tij ish-boksier. Marjan Levanti u arrestua në 2013 por pas daljes nga burgu e shoqja nuk e ka takuar dhe nuk ka lejuar të takojë as 2 fëmijët. Pas kërkesës për divorc ai ka shkuar tek Ferit Kocaqi, i vjehrri dhe ka kërkuar të takojë të shoqen. Por ata e kanë ndaluar. Më pas në konflikt e sipër i ka plagosur me thikë.
Dje kur ka qenë në ndjekje të policisë, 37-vjeçari ka thënë “vetëm i vdekur kthehem në burg” dhe ndaj ka tentuar të hidhet nga pallati.
