Ashtu siç kishte premtuar, deputeti i LIBRA-s Ben Blushi i ka thënë të gjitha sot. Akuza nga më të ashprat në drejtim të kryeministrit Edi Rama.
Deputeti dhe themeluesi i LIBRA-s, Ben Blushi ka lëshuar akuza të forta në sallën e Kuvendit, duke akuzuar kryeministrin Edi Rama se e ka mbushur Kuvendin, qeverinë dhe ministritë e tij me njerëz të inkriminuar.
Duke folur për personat e inkriminuar, Ben Blushi ka folur vetëm për rastin e fundit, atë që prej 7 muajsh nuk është arrestuar Klemend Balili.
Ai ka akuzuar Ramën se nuk e arreston Balilin sepse thonë se Balili është i LSI-së dhe po u arrestua ai, bie koalicioni.
“Po të marr rastin e fundit Klemend Balili. Nuk qenka urgjencë që ai nuk arrestohet prej 7 muajsh. Çfarë nevoje ka për të përkthyer 10 mijë faqet e DEA-s amerikane. Pse nuk arrestohet? Sepse është i LSi-së dhe nëse ai arrestohet koalicioni cenohet dhe bie. A ka qeveri në Evropë që thotë nëse një kriminel arrestohet na bie qeveria. Kjo është qeveria e Elvis Roshit dhe Kelmend Balilit. Ai madje i ka thënë Ramës: “Ti je pronari i Rroshit, Dakos dhe Ndokës”.
Votat e tua nuk mjaftojnë për të të mbajtur në pushtet, këta të sigurojnë vota. Në Shkodër, dihet kush janë kriminelët. Dy prej tyre janë në burg, në Lezhë”, është shprehur Ben Blushi gjatë fjalës së tij në Kuvend.
