Një 42-vjeçar shqiptar është arrestuar së fundmi nga policia italiane në Vicenza. Ai është ndaluar fill pasi i ka dhënë një dozë heroinë një konsumatori.
Gazmir Moku, “Gazi” ose i njohur ndryshe si “Mike Tyson” për shkak të fizikut të tij, është emër i njohur për policinë italiane dhe kishte përfunduar njëherë në telash 10 vite më parë për një rrjet shpërndarësish, ndërkohë që rezulton i përfshirë edhe në hetime të tjera.
Shqiptari u arrestua menjëherë pasi i kishte dhënë një dozë heroine një konsumatori.
42-vjeçari që punonte si punëtor krahu në Itali mbrohet nga avokati Davide Osti, ndërsa sot do të merret në pyetje nga gjykatësi për t’i dhënë mundësi të mbrohet nga akuzat.
Moku, i shoqëruar në qeli me urdhër të prokurorisë, kontrollohej prej kohësh nga policia e vendit fqinjë, pasi konsiderohej si një “qendër e tregut të heroinës”.
Mbrëmjen e së mërkurës pas përfundimit të turnit, (pasi Moku punonte si punëtor i thjeshtë në një fabrikë lëkurësh në zonë), ai do të takohej me një klient.
Pas shitjes së sasisë së heroinës, ndërhynë forcat e policisë që bllokuan 42-vjeçarin. Me vete, ai kishte edhe 18 doza të tjera heroine që do të shpërndaheshin brenda pak orësh. Menjëherë më pas, u krye një kontroll edhe në vendin e punës së shqiptarit. Në dollapin e tij personal u gjetën rreth 20 mijë euro, të dyshuara se vinin nga shitja e drogës, që u sekuestruan.
