Në Ditën e Rinisë, Partia Demokratike ka zgjedhur protestën në vend të festimeve. Më datën 8 dhjetor të rinjtë e Forumit Rinor Demokrat, do të protestojnë në të njëjtën orë para 4 institucioneve qeveritare për tu bashkuar më pas para Kryeministrisë.
Të rinjtë, nga i gjithë vendi në orën 11:00 do të mblidhen para Ministrisë së Arsimit, kundër reformës në arsimin e lartë, gjithashtu një grup tjetër do të jetë para Ministrisë së Shëndetësisë, për korrupsionin dhe kontrata koncesionare të firmosura nga Ministri Ilir Beqaj.
Gjithashtu të tjerë të rinjtë do të protestojnë në të njëjtën kohë para Ministrisë së Brendshme për situatën e drogës dhe para Bashkisë së Tiranës, për vdekjen e 17-vjeçarit Ardit Gjoklaj, në landfillin e plehrave në Sharrë.
Forumi Rinor i Partisë Demokratike ka publikuar spotin lajmërues të protestave, ndërsa është shpërndarë në rrjetet sociale nga organizatorët dhe ish-kryeministri Sali Berisha. Pas Ministrive, në orën 12:00 të rinjtë do mblidhen para Kryeministrisë në tubim kundër kryeministrit Edi Rama, për t’iu drejtuar më pas Qytetit Studenti në të njëjtin intenerar që ndoqën studentët në vitin 1991.
Ndërsa në Qytetin Studenti është parashikuar një bashkëbisedim me kryetarin e PD-së Lulzim Basha.
