Komisioni i Vencias e ka dhënë tashmë opinionin për ligjin e Vetting-ut, sipas kërkesës së bërë nga Gjykata Kushtetuese.
Një kopje konfidenciale i është shpërndarë sot delegacionit të Bashkimit Europian në Shqipëri. Gjykata Kushtetuese do ta ketë zyrtarisht në dorë më 9 dhjetor. Nuk dihet ende publikisht se cili është opinioni, por po të dëgjoje ambasadorin amerikan Donald Lu sot dhe deputetin e PD, Oerd Bylykbashin dje, vendimi kuptohet lehtësisht. Lu i kujtoi opozitës se duhet të pranonte opinionin e Venecias, duke cituar vetë mendimin e Sali Berishës për Komisionin.
“Jam dakord me doktor Sali Berisha që ka thënë se opinioni i Komisionit të Venecias ofron një bazë dolide për t’i dhënë vendit reformën më të mirë të drejtësië. Ai tha se beson që të gjitha forcat politike shqiptare duhet të mbështesin këshillën e urtë të Presidentit të Komisionit të Venecias. Kam besim në mençurinë e popullit shqiptar, është i zgjuar dhe i paepur, është i lodhur nga korrupsioni në këtë vend”, u shpreh amabasadori i SHBA, mbështetësi më i fuqishëm i Vetting-ut.
Por PD përmes deputetit Bylykbashi i parapriu një opinioni “pozitiv” të Venecias për ligjin e shumëdiskutuar.
“Komisioni i Venecias është investuar me tre pyetje nga Gjykata Kushtetuese të cilat nuk kanë të bëjnë me kërkesat për antikushtetueshmëri të shtruara nga Partia Demokratike para Gjykatës, por për çështje të tjera, sepse nuk mund të jetë Komisioni i Venecias që të vendosë nëse një ligj është kushtetues apo jo. Këtë rol, si gjithmonë Komisioni i Venecias ia lë autoriteteve kompetente”, u shpreh Bylykbashi.
Nga këto deklarata kuptohet lehtësisht pozicioni i palëve: Mbështetësit e ligjit të Vetting-ut ashtu siç është (ambasadori Lu dhe kryeministri Rama i cili shprehu besim dje për mendim pozitiv të Venecias) kërkojnë që të vendoset mbi bazën e opinionit të Komisionit të Venecias. Ndërsa kundështarët e ligjit për mënyrën se si është hartuar (opozita) kërkojnë që për antikushtetutshmërinë të shprehet vetë Gjykata Kushtetuese.
Tani topi ka mbetur në derën e Gjykatës Kushtetuese; a do të vendosë ajo sipas opinionit të Komisionit të Venecias apo do ta shqyrtojë në themel kushtetutshmërinë e ligjit? Gjithësesi, vendimi nuk pritet të jetë i shpejtë. Kreu i Gjykatës e ka paralajmëruar se do të duhet kohë sa të përkthehet opinioni i Venecias, më pas të shqyrtohen argumentat e tij dhe të jepet vendimi. Ky ligj ishte një ndër kushtet që Shqipëria duhet të plotësojë për hapjen e negociatave, vendim që Këshilli Europian pritet ta marrë më 15 dhjetor. /Lapsi.al
